Jambyl oblysynyń ákimi Erbol Qarashókeev jer silkinisi bolǵan Merki jáne T.Rysqulov aýdandarynda bolyp, tótenshe jaǵdailar jónindegi jedel shtabtyń otyrysyn ótkizip, búlingen nysandardy aralady, – dep habarlaidy Dalanews.kz.
Búgin túnde Jambyl oblysynyń birqatar aýdany men Taraz qalasynda jer silkinisi tirkeldi.
Jer asty dúmpýiniń joǵary qarqyny – 5 ball, bul Merki aýdanyndaǵy Merki aýylynda tirkeldi. T.Rysqulov aýdanynyń Qulan aýylynda jer silkinisiniń kúshi 4 ball, Taraz, Shý qalalarynda, Qordai, Moiynqum aýdandarynda 2 ball boldy.
"Oblys ákiminiń tapsyrmasyna sáikes jedel shtab quryldy. Oblys ákiminiń orynbasary Qanatbek Mádibek tóraǵalyq etken onyń quramyna azamattyq qorǵaý qyzmetiniń, jergilikti atqarýshy organdardyń, tiisti vedomstvolardyń ókilderi kirdi.Zardap shekkender týraly aqparat joq. Aýdandardaǵy nysandar shtattyq rejimde jumys istep jatyr", - dep jazylǵan habarlamada.
Tótenshe jaǵdai saldarynan Merki aýdandyq ortalyq aýrýhanasynyń, Merki aýyldyq okrýgindegi «Baldáýren» balabaqshasynyń ǵimarattarynda jáne Taldybulaq aýylyndaǵy turǵyn úidiń ashanasynda qabyrǵa jaryqtary anyqtalǵan.
T.Rysqulov aýdany Abai aýylyndaǵy turǵyn úidiń, Jańaturmys aýylyndaǵy 6 baspananyń, aýyldyq mekteptiń, Qaraqystaq aýyldyq okrýginiń Kamenka aýylyndaǵy mádeniet úiiniń qabyrǵalarynda jaryqtar paida bolǵan.
"Arnaiy komissiia oblys ákiminiń tapsyrmasy boiynsha keltirilgen shyǵyndy anyqtaý jumystaryn júrgizedi. Onyń quramyna QR Tótenshe jaǵdailar ministrligi Seismologiialyq baiqaý jáne zertteýler ulttyq ǵylymi ortalyǵynyń ókilderi kiredi.Aýdandardaǵy nysandardy mamandar aralap, ahýaldy kózben kórdi. Merki aýdanynda ainalma joldarǵa 55 adam, 33 tehnika, T.Rysqulov aýdanynda 65 adam, 40 birlik tehnika jumyldyryldy", - dep jazylǵan habarlamada.
45 eldi meken zerttelgen.
Sonymen qatar, Qyrǵyz Respýblikasynyń Tótenshe jaǵdailar ministrligimen ózara is-qimyl kezekshi bólim arqyly uiymdastyrylǵan. Shoń-Qaqpa jáne Orto-Toqai sý qoimalary qalypty jumys istep tur.
Politsiia men TJD qoǵamdyq qaýipsizdikti qamtamasyz etý boiynsha sharalar qabyldap jatyr.
8(7262)513575 nómiri boiynsha jedel jeli iske qosylǵan.
