Alaida bul aqparat rastalmady. Muhamediulynyń baspasóz hatshysy muny joqqa shyǵardy, artynsha eks-ministr Qazaqstan halqy men prezident Toqaevqa beineúndeý joldap, bolǵan oqiǵa týraly baiandap berdi, dep habarlaidy Dalanews.kz.
Arystanbek Muhamediuly aqsha jymqyrýǵa qatysty daý 2014 jyly Mádeniet ministri bolyp taǵaiyndalǵan soń bastalǵanyn aitady.
Osy tusta ǵarysh keńistigi týraly film túsirilgen jáne jobany iske asyrý úshin ol Talǵat Musabaev jáne Tuńǵyshbai Jamanqulovpen kezdesken.
"Sosyn ómirimde alǵash ret kórgen Talǵat Jánibekov degen rejissermen jolyqtym. Bir kezdesýde Talǵat Musabaev bul jobanyń shikiligi kóp ekenin, ǵaryshqa esh qatysy joq, bir fantaziia ekenin alǵa tartyp, jobaǵa qatyspaitynyn málimdedi. Árine, kúdik bolǵan soń barlyǵyn teksere bastadyq. Talǵat Jánibekov – ómirinde ekinshi ret kino túsirip turǵan azamat. Sosyn Tuńǵyshbai Jamanqulov filmdi túsirýge amerikalyq "Aldamis" degen úlken kompaniianyń qatysatynyn aitty", – dep málimdedi ol Facebook paraqshasynda jariialaǵan beineúndeýde.
Arystanbek Muhamediulynyń sózinshe, Tuńǵyshbai Jamanqulov film túsirýge arnalǵan 550 million teńgeniń 100 millionyn alýǵa qajetti qujattardy usynbaǵan.
Keiin "Qazaqfilm" men Jamanqulov basqaratyn "Turan Universal Business" kompaniiasy arasynda sot bolǵan.
"Sot "Qazaqfilm" kompaniiasynyń durys ekenin dáleldedi. Appeliatsiialyq sotta da Jamanqulovtyń kompaniiasy jeńildi. Keiin "Aldamis Rýs" kompaniiasynyń osy shara úshin tirkelgen bir kúndik kompaniia ekeni anyqtaldy. Eshqandai qarjylyq operatsiialar júrmegen. Jeke qorynda tek 10 000 rýbl nemese 50 000 teńge ǵana bolǵan.
Maǵan shabýyl jasalǵan sebebi – aqshany jalǵan reseilik kompaniianyń qaltasynda ketýine jol bermeýim.
Bar kinám osy. Ári qarai "Aldamis Rýs" kompaniiasynyń qaidan shyqqanyn, amerikalyq "Aldamis" kompaniiasymen qandai bailanysy baryn tekserý úshin arnaiy suranys jiberdik. Osy kezde Tuńǵyshbai Jamanqulov "Aldamis" kompaniiasynan hat keldi dep qujatty ustatty. Biraq sońynda qoiylǵan qol jalǵan bolyp shyqty", – dep qosty Arystanbek Muhamediuly.
[video width="854" height="480" mp4="https://dalanews.kz/wp-content/uploads/2022/05/281674219_1453392168410888_3271943782914929490_n.mp4"][/video]
Burynǵy Mádeniet ministri "Aldamis Rýs" pen amerikalyq "Aldamisa" kompaniiasynyń arasynda eshqandai bailanys joq ekenin málimdedi.
"Sosyn Tuńǵyshbai Jamanqulov maǵan 3 million dollardy "Aldamis Rýs" kompaniiasyna aýdarmasam, shabýyl jasalatynyn, ómirimde úlken másele týyndaitynyn aitty.
Onyń artynda sol kezde prezident ákimshiliginiń basshysy orynbasary qyzmetinde bolǵan, keiin Otandy satqany úshin sottalǵan Baǵlan Mailybaev turǵan.
Onyń ústine Dariǵa Nazarbaeva birneshe ret tapsyrma bergendikten, Tuńǵyshbai Jamaqulov qolynan kelgen is-áreketterdi jasady", – deidi Arystanbek Muhamediuly.
Jasalǵan shabýyldardyń alǵashqysy rejisser Talǵat Jánibekovtyń Muhamediulyna qarsy túsirgen beineúndeýi bolypty. Alaida videonyń jalǵan ekeni dáleldengen deidi. Al keiin Tuńǵyshbai Jamanqulov ózi kelip Arystanbek Muhamediulynan keshirim suraǵan.
"Kelip keshirim surady. Qolyma hatty ustatty. Nursultan Nazarbaevtyń atyna jazylǵan hatta aradaǵy kelispeýshilik týraly aitylǵan. Alaida men bul hattyń kerek emes ekenin, halyqtyń aldynda keshirim suraýy kerek ekenin aittym. Osydan keiin ǵana men birge jumys isteitinimdi málimdedim", – dep qosty ol.
Aitýynsha, osy oqiǵadan keiin Tuńǵyshbai Jamanqulov suhbattarynda múlde basqa aqparat taratqan. Sondai-aq ol sóz sońynda óz tarapynan zań buzýshylyq bar ekeni anyqtalsa, tiisti jazany óteýge ázir ekenin málimdedi.
