Májilis depýtaty Abzal Quspan premer-ministr Oljas Bektenovke depýtattyq saýal joldap, túzeý mekemeleriniń jaiyn aitty, dep habarlaidy Dalanews.kz.
"2023 jyly depýtat bolyp sailanǵan sátten beri elimizdegi barlyq negizgi túzeý mekemesin aralap shyqtym. Jýyrda ǵana Batys Qazaqstan oblysyndaǵy jaǵdaimen tanysyp qaittym. Aitarym jaǵdai aýyr emes, óte aýyr. Qylmystyq-atqarý júiesiniń (QAJ) sozylmaly qarjylandyrylmaýyna bailanysty bul saladaǵy negizgi mindetter oryndalýy qaterge ushyrap otyr", - dedi ol.
Depýtattyń sózinshe, 2025 jylǵa IIM QAJ komiteti 151,4 mlrd teńge somasynda shyǵyn josparlaǵanymen, tek 88,3 mlrd teńge maquldanǵan. Bul - 63 mlrd teńge nemese 42% defitsit degen sóz.
"Eń osal baǵyttardyń qatarynda arnaiy kontingentti azyq-túlikpen, kiim-keshekpen, kommýnaldyq qyzmettermen qamtamasyz etý bar. Jaǵdaidy odan ári qiyndatyp turǵan – sottalǵandar sany artýy (2024 jyly – 36 923, 2025 jyly – 40 364) jáne qyzmet kórsetý tarifteri kóterilýi", - dedi ol.
Abzal Quspan búginde shuǵyl túrde 14,1 mlrd teńge kóleminde qosymsha qarjy qajet ekenin aitty, onyń ishinde:
- 8,7 mlrd tg – tamaqtandyrýǵa (sonyń ishinde 2,3 mlrd teńge bereshekti óteýge);
- 3,4 mlrd tg – kommýnaldyq qyzmetterdi tóleýge;
- 2 mlrd tg – kiim-keshek jáne tósek-jabdyq alýǵa.
"Sottalǵan shetel azamattaryn óz elderine qaitarý máselesi de áli sheshimin tappai otyr. Jyl basynan beri 1 000-nan asa sheteldik sottalǵannyń nebári 45-i ǵana elderine qaitarylǵan. Keibir memleketter óz azamattaryn qabyldaýdan bas tartyp otyr. Osy baǵyttaǵy halyqaralyq kelissózder men yntymaqtastyqty jandandyrý qajet", - dedi ol.
Onyń sózinshe, eldegi túrmelerdiń infraqurylymy da múlde eskirgen.
"Qazaqstandaǵy túzetý mekemeleriniń 75%-y ótken ǵasyrdyń 30–70 jyldary, tipti keibiri patshalyq Resei zamanynda, 200–300 jyl buryn salynǵan. Búgingi talapqa sai kelmeitin baraq úlgisindegi túrmelerdi kameralyq tiptegi zamanaýi mekemelermen almastyrý – kezek kúttirmeitin mindet. Baraqta, 80–100 adam birge turatyn ortada tárbie jumystaryn júrgizý múmkin emes. Ondai jerde ózindik qylmystyq sýbmádeniet qalyptasady. Osy ortada dini ekstremizmniń de tamyry jaiylyp barady", - dedi ol.
