Irandaǵy soǵys pen Taiaý Shyǵystaǵy jaǵdaidyń ýshyǵýy Batys elderiniń ekonomikasyna keri áser ete bastady. Bul týraly Financial Times basylymy málimdedi, dep habarlaidy dalanews.kz.
Basylym málimetinshe, Ormýz buǵazy tóńiregindegi daǵdarystan keiin munai, janarmai jáne áýe biletteriniń baǵasy qymbattaǵan. Sonyń saldarynan AQSh, Ulybritaniia jáne Eýropa elderinde infliatsiia halyq tabysynyń ósiminen asyp túsken.
Mysaly, AQSh-ta jalaqy 3,6 paiyzǵa óskenimen, taýarlar men qyzmetterdiń baǵasy 3,8 paiyzǵa qymbattaǵan. Sonyń saldarynan halyq tabysyndaǵy ósim infliatsiia áserinen sezilmei qalǵan.
Ulybritaniiada da jaǵdai osyǵan uqsas. Elde jalaqy ósimi baiaýlap, halyq tabysynyń artýy is júzinde baiqalmai qalǵan.
Sarapshylardyń aitýynsha, Parsy shyǵanaǵynan munai men gaz jetkiziliminiń qysqarýy Eýropadaǵy energetikalyq daǵdarysty kúsheitýi múmkin. Bul halyqtyń tabysyna da keri áser etedi.
Aberdeen investitsiialyq kompaniiasynyń bas ekonomisi Pol Diggl eger Ormýz buǵazy uzaq ýaqytqa jabylsa, álemdik energetika naryǵynda jańa daǵdarys bastalýy yqtimal ekenin aitty.
Onyń boljamynsha, mundai jaǵdaida álemdik naryqta munai tapshylyǵy kúsheiip, Brent markaly munai baǵasy barreline 180 dollarǵa deiin kóterilýi múmkin.
