Shara barysynda Yqylas Dúkenuly týraly 1993 jyly «Qazaqtelefılm» kınostýdıasynda rejıser Tilegen Ahmetov túsirigen «Yqylas» atty derekti fılmnen úzindi kórsetildi. Keshke belgili óner adamdary, mýzykatanýshy ǵalymdar, kúıshiler, ánshilerjáne Yqylas Dúkenulynyń urpaqtary men kúıshiniń jerlesteri qatysty. Belgili qoǵam qaıratkerleri men óner adamdary Muhametqasym Shákenov, Ábdimanap Kópbergenuly, Kópen Ámirbek, Musaǵalı Dýambekov, Janǵalı Júzbaev,Januzaq Músápirler kúıshi shyǵarmashylyǵy týraly tyń oılaryn ortaǵa saldy.
Qazaq ulttyq Óner akademıasynyń Qobyz jáne orys halyq mýzykasy kafedrasynyń aǵa oqytýshysy, Halyqaralyq, respýblıkalyq baıqaýlardyń laýreaty Almat Saıjan men Yqylas Dúkenulynyń urpaǵy, Qobyz óneriniń dástúrli ustanýshysy, Kúıshiler odaǵynyń Atyraý obl. fılıalynyń jetekshisi, Respýblıkalyq konkýrstary men xalyqaralyq festıválderdiń laýreaty, Atyraý oblysyndaǵy Dına Nurpeıisova atyndaǵy akademıalyq qazaq xalyq aspaptar orkestriniń solısi Aqnar Táttibaıqyzy Sháripbaeva Yqylas Dúkenulynyń kúılerin naqyshyna keltire oryndady.
Y.Dúkenulynyń portretin salǵan sýretshi, QR Eńbek sińirgen qaıratkeri Januzaq Músápir dáýlesker kúıshi Yqylas Dúkenuly sýretiniń qyr-syrymen jurtshylyqpen bólisti.
Kesh sońyndaY.Dúkenulynyń urpaqtarynyń atynan Habar telearnasynyń tehnıkalyq qyzmetiniń bastyǵy Edil Ermekbaev pen Qobyz óneriniń dástúrli ustanýshysy, Kúıshiler odaǵynyń Atyraý obl. fılıalynyń jetekshisi, Respýblıkalyq konkýrstary men xalyqaralyq festıválderdiń laýreaty, Atyraý oblysyndaǵy Dına Nurpeıisova atyndaǵy akademıalyq qazaq xalyq aspaptar orkestriniń solısi Aqnar Táttibaıqyzy Sháripbaevasóz aldy.Yqylas Dúkenuly artyna qaıtalanbas mýzykalyq muramen birge óziniń izdeýshisi bolarlyq usqyndy urpaq qaldyrǵandyǵyn atap ótip, kúıshiniń urpaqtary týraly, uldary men qyzdary, nemere-shóbereleri týraly tolyqqandy aqparat berdi. Yqylas Dúkenulynyń murasyn nasıhattaý jumysy ary qaraı jalǵasa beretindigine toqtaldy. Sharanyń uıymdastyrýshysy«Jańǵyrý» qoǵamdyq qorynyń qyzmetkerlerimen keshke kelgen jurtshylyqqa alǵystaryn bildirdi.
Keshti Shalqar radıosynyń qyzmetkerleri belgili ónertanýshy, kúıshi, Sársenǵaly Júzbaı men ánshi Jasulan Naýryzbaıuly kúıshiniń shyǵarmashylyǵyna taldaý jasaı otyryp, júrgizdi.
Qazaqtyń ataqty kúıshi-qobyzshysy, kompozıtor, qylqobyzda oınaýdyń asqan dúldúl sheberi Yqylas Dúkenulynyń bıyl týǵanyna 176 jyl. Yqylastyń ósken ortasynda kúıshilik óner aıryqsha áspetteletin dástúrge aınalyp, dáýlesker kúıshilerdiń qalyń shoǵyry qalyptasqan. Táttimbet, Sary, Toqa, Daırabaı, Qyzdarbek, Itaıaq, Ábdı sıaqty kúıshilerdiń Yqylas biriniń dańqyn estip, kúıin qulaǵyna quıyp ósse, kelesisiniń kózin kórip, qadirles syılas bolǵan. Bul ortada baǵzydan jetken teris buraý kúıleri ushtalyp, órisin uzartqan. Yqylas bolsa sol uly dástúrdi qobyz tilinde jalǵastyrýshy dáýlesker kúıshi. Qorqyt atadan keıin táńirlik aspapqa adamnyń tilin darytyp, joǵyn joqtatyp, muńyn muńdatqan birtýar kompozıtor. Keshtiń maqsaty –nasıhattalýy kemshin dástúrli mýzyka men onyń tanymal tulǵalarynyń biri - Yqylas Dúkenulynyń shyǵarmalaryn tyńdarman nazaryna usyný jáne ol týraly tyń derekterdi rýhanı aınalymǵa qosý bolatyn.
