Slettiń sońǵy kúni mazmundy ári óte qyzyqty boldy. Balalar bilim salasyndaǵy alǵash «Oskar» saltanatyna – IQanat respýblikalyq sletine qatysýshylardy marapattaý rásimine qatysty.
Balalardy osyndai aýqymdy sharanyń aiaqtalýymen quttyqtaýǵa QR Premer-Ministriniń orynbasary Eraly Toǵjanov, «IQANAT bilim berý qory» QQ Qamqorshylyq keńesiniń tóraǵasy Aidyn Rahymbaev, Qordyń qamqorshylary men joba tálimgerleri keldi.
«IQANAT bilim berý qory» QQ atqarýshy direktory Kamila Basharova sletke barlyq qatysýshy «júzden júirik, myńnan tulpar» ekenin, sondyqtan ózderimen jasty 36 myń qatarlastarynan alǵa sýyrylyp shyǵyp, búgin osynda otyrǵandaryn atap ótti.
– Munda jeńilis tapqandar joq, sizderdiń árqaisylaryńyz – kóptegen kedergilerdi jeńip, osy jerde bas qosyp otyrsyzdar. Barlyǵyńyzdy slettiń sátti aiaqtalýymen quttyqtap, júregińizde bilim men jańalyqtarǵa degen qushtarlyq pen súiispenshilikti, bárin jasai alatyndyǵyńyzǵa senimdi bolýǵa kómektestik dep úmittenemin! Tipti 100 bala ǵana mektebimizge grant alǵanymen, qalǵan 650-i bizdiń olimpiadalyq bilim berý baǵdarlamalarymen qamtylady jáne 11-synypqa deiin UBT-ny tabysty tapsyrýǵa jetkizetin bolamyz, – dep atap ótti Kamila Basharova.
Atalǵan keshte IQanat High School of Burabay mektebinde oqýǵa shaqyrý alǵan 100 Olimpiada jeńimpazynyń esimi belgili boldy.
– Óte qýanyshtymyn jáne áli kúnge deiin IQanat grantyn alǵanyma senbei júrmin. Men úshin bul keremet múmkindik jáne ony mindetti túrde qoldanamyn. Bolashaqta qandai mamandyq tańdasam da, Qazaqstan tarihynda óz izimdi qaldyrýdy armandaimyn. Osy 5 kún ishinde biz erekshe shabyt pen bilim alǵanymyz sonshalyq, endi osynyń barlyǵyn durys arnaǵa baǵyttaý kerek, – deidi Qaraǵandy oblysy Abai aýdany Topal aýylynan kelgen Arman Aitqaliev.
– Júz jeńimpaz qataryna kire almaǵanyma qaramastan, óte qýanyshtymyn. Óitkeni elimizdiń astanasynda osyndai úlken merekege qatysý múmkindigin ielendim. Oqý-aǵartý ministri Ashat Qanatuly Aimaǵambetovpen yntalandyratyn kezdesýde ol bizdiń, iaǵni qazirgi balalar úshin kóptegen múmkindikter bar ekenin aitty. Sondyqtan men óz armanymdy oryndaý úshin barlyq múmkindikti paidalanatyn bolamyn, - deidi Soltústik Qazaqstan oblysy Aiyrtaý aýdany Saýmalkól aýylynan kelgen Dilnaz Jaqypova.
«IQanat» olimpiadasy jáne Qordyń basqa baǵdarlamalary aýyldan kelgen myńdaǵan balalarǵa eń joǵary tehnologiialy mektepterdiń biri - IQanat High School of Burabay mektebine oqýǵa túsýge jáne barlyq aqtyq synǵa jetýshilerdi olimpiadadan keiingi bilim berý baǵdarlamalarymen súiemeldeýge, joǵary bilikti pedagogtarmen pikirlesýdiń baǵa jetpes tájiribesin alýǵa, kókjiekti keńeitip, jalpy ómir súrý deńgeiin arttyrýǵa jáne sonyń nátijesi retinde álemniń úzdik joǵary oqý oryndaryna túsýge múmkindik beredi.
Aita keteiik, «Iqanat» jobasyn iske asyrý jáne aýyl oqýshylarynyń osyndai joǵary nátijege qol jetkizýi olarǵa kómek kórsetý nietimen birikken izgi jandar – Qordyń Qamqorshylarynyń qoldaýy arqasynda múmkin bolyp otyr. Qordyń ótken jyldardaǵy bilim berý baǵdarlamalarynyń túlekteri – aýyl mektepteriniń oqýshylary Nazarbayev University, University of Purdue, Polytechnic University of Hong Kong, University of Chicago jáne taǵy basqa ozyq joǵary oqý oryndaryna tústi.
