Jetisý oblysynyń soty áleýmettik jelide jalǵan málimet jariialady dep aiyptalǵan “Krisp.tdk” paraqshasynyń avtoryna qatysty ákimshilik isti qarady, dep habarlaidy Dalanews.kz.
Is materialdaryna sáikes, bloger 2025 jylǵy 31 mamyrda azamat K.A.-nyń ar-namysy men zańdy múddelerin buzatyn, resmi túrde rastalmaǵan aqparatty Instagram paraqshasynda jariialaǵan.
Sot málimetinshe, bul jazba azamattyń quqyǵyna nuqsan keltirgen. Alaida bloger óz kinásin moiyndamaǵan. Soǵan qaramastan, áleýmettik jeliden alynǵan skrinshottar men basqa da materialdar aiǵaq retinde qabyldanyp, onyń kinásin dáleldeitin negiz boldy.
Nátijesinde, sot blogerdi QR Ákimshilik quqyq buzýshylyq týraly kodeksiniń 456-2-baby 5-bóligi boiynsha jaýapty dep tanyp, oǵan 117 960 teńge kóleminde aiyppul saldy.
Aita keteiik, bul sheshim áli zańdy kúshine engen joq.
Eske salaiyq, buǵan deiin Jambylda agressivti jarnama túsirgen bloger jaýapqa tartylǵany týraly jazǵan edik.
Sýpermarketterdiń biriniń jarnamasyn túsirý kezinde qoǵamdyq tártipti óreskel buzǵan bloger politsiia qyzmetkerlerimen jaýapkershilikke tartyldy.
Bolashaq kórermenderdiń nazaryn aýdartýǵa tyrysqan ol qoiylym retinde avtokóliktiń aldyńǵy áinegin syndyrǵan jáne jolaýshymen dóregi daýyspen sóilesip, ótip bara jatqan adamdardy shoshytqan.
Politsiia quqyq buzýshyny anyqtap, ony usaq buzaqylyq jasaǵany úshin ákimshilik jaýapkershilikke tartty.
Nátijesinde sýpermarket jarnamasyn agressivti túrde túsirý bloger úshin 10 táýlikke ákimshilik qamaýǵa alynýmen aiaqtaldy.
Politsiia qyzmetkerleri azamattardy kóshede jáne qoǵamdyq oryndarda zańdy buzbai,ózgelerdiń ómirine qaýip tóndirmeýge, jolda tártipti qatań saqtaýǵa shaqyrady.
