Ile Alataýynda adasyp ketken eki jasóspirim tabyldy, dep habarlaidy dalanews.kz.
TJM deregine súiensek, 2009 jyly týǵan eki qyz Býkreev shyńyna shyǵý kezinde joǵalyp ketken. Olar jeti adamnan turatyn toppen birge taýǵa kóterilgen, alaida "Pioner" baǵytynda kele jatqanda toptan qalyp qoiyp, bailanys úzilgen.
Qutqarýshylar izdeý jumystaryn túnde, qolaisyz aýa raiyna qaramastan júrgizgen. Taýda jańbyr jaýyp, qozǵalys qiyndaǵan. Soǵan qaramastan qyzdar tabylyp, olar qatty tońyp, sharshaǵany anyqtalǵan. Mamandar alǵashqy kómek kórsetip, olardy qaýipsiz jerge jetkizdi.
Olarǵa meditsinalyq kómek qajet bolmaǵan. Qyzdar aman-esen taýdan túsirilip, jaqyndaryna tabystaldy.
