Sátbaev ýniversitetinde injenerlik ázirlemelerdi tsifrlyq modelden bastap ónerkásiptik úlgige deiin jetkizýge múmkindik beretin Mechanical Prototyping & Pilot Production ortalyǵy ashyldy, dep habarlaidy dalanews.kz.
Ortalyq Idea to Product - «ideiadan ónimge deiin» qaǵidaty boiynsha jumys isteidi. Bir alańda jobalaý, daiyndaý jáne synaqtan ótkizý kezeńderi biriktirilgen. Munda injenerlik ázirleme CAD/CAM-model men konstrýktorlyq qujattamadan bastap prototipke, ónerkásiptik úlgige jáne shaǵyn seriialy óndiriske deiingi joldan óte alady.
Ortalyq stýdentter men jas ǵalymdarǵa tálimgerlerdiń jetekshiligimen zamanaýi óndiristik jabdyqtarda jumys isteýge jáne naqty injenerlik jobalarǵa qatysýǵa múmkindik beredi. Ǵalymdar óz ázirlemelerin tájiribelik úlgiden daiyn ónimge deiin jetkize alady.
Oqý-óndiristik alańdarda bir mezette 100 adamǵa deiin jumys istei alady. Stýdentter naqty injenerlik mindetterdi sheshýge qatysyp, zamanaýi jabdyqtarmen jumys isteý arqyly óndiristik úderistiń ózinde praktikalyq tájiribe jinaqtaidy.
«Keide seriktesterimiz stýdentterdiń buraýyshty jaqynnan kórmegenin aityp jatady. Munda olar zamanaýi óndiristik jabdyqtarmen jumys isteýdiń praktikalyq tájiribesin alyp, mashina jasaý ónimderin óz qoldarymen shyǵara bastaidy», - dedi Sátbaev ýniversiteti Energetika jáne mashina jasaý institýtynyń direktory Qasym Elemesov.
Ortalyqtyń óndiristik infraqurylymyna metaldy lazermen kesýge, iiýge, soǵýǵa, dánekerleýge jáne qurastyrýǵa arnalǵan jabdyqtar kiredi. Munda zerthanalyq jáne resýrstyq synaqtar, klimattyq synaqtar, sozylý júktemesine tózimdilikti tekserý jáne sapany baqylaý júrgiziledi.
Ortalyq jumysynyń alǵashqy baǵyttarynyń biri - temirjol mashina jasaý salasy. LocoSystems KZ kompaniiasymen birlesip, Sátbaev ýniversiteti jyljymaly quramǵa arnalǵan tejegish qalyptaryn óndirý jobasyn júzege asyryp jatyr. Joba temirjol salasyndaǵy mańyzdy komponentter importynyń ornyn otandyq ónimmen almastyrýǵa jáne Qazaqstandaǵy mashina jasaý quzyretterin damytýǵa baǵyttalǵan.
«Ǵylymdy, bilimdi, biznesti jáne óndiristi bir jerde toǵystyrýǵa tyrystyq. Osy arqyly jas ǵalymdarǵa stanoktyń janynda turyp, óz ideialaryn júzege asyrýǵa múmkindik bergimiz keledi», - dedi LocoSystems KZ basshysy, Sátbaev ýniversitetiniń túlegi Maqsat Qanatbaev.
Ortalyq ǵalymdardyń óndiristik bazasyna ainalady. Munda prototipter men tájiribelik úlgiler jasaýǵa, synaqtar júrgizýge, ázirlemelerdi óndiriske engizýge daiyndaýǵa, injenerlik tapsyrystardy oryndaýǵa jáne ónimniń shaǵyn seriialaryn shyǵarýǵa bolady.
Bul tásil Qazaqstan Respýblikasy Ǵylym jáne joǵary bilim ministrliginiń injenerlik bilim berýdi damytý tujyrymdamasynyń negizgi baǵyttaryna sáikes keledi. Qujat aiasynda stýdentterdiń praktikalyq daiarlyǵyn kúsheitý jáne bilim berýdi naqty óndiristik úderistermen ushtastyrý kózdelgen.
«Jaqsy injenerlik ideia qysqa merzimde jumys isteitin prototipke, odan keiin naqty ónimge ainala alýy kerek. Ol úshin jabdyq, kásibi quzyret jáne stýdent nemese jas ǵalym óz ideiasyn synap, qatelesip, qaita jasap kórýge múmkindik alatyn orta qajet. Jańa ortalyq dál osyndai orta qalyptastyrady», - dedi Sátbaev ýniversitetiniń prorektory Sapar Shalabaev.
Osylaisha, Mechanical Prototyping & Pilot Production ortalyǵy ýniversitet qabyrǵasynda úsh mańyzdy baǵytty - injenerlerdi daiarlaý, jańa ázirlemeler jasaý jáne olardy tájiribede qoldanýdy - bir arnaǵa toǵystyrady. Munda stýdenttiń ideiasy naqty buiymǵa, al ǵylymi ázirleme ónerkásipte qoldanýǵa daiyn ónimge ainala alady.
