Burynǵy dini qyzmetker Iakov (Vladimir) Vorontsovtyń isi boiynsha tergeý aiaqtaldy, alaida qamaýda otyrǵan azamat meditsinalyq kómek kórsetilmei jatqanyn aityp shaǵymdanǵan, dep habarlaidy dalanews.kz.
Bul týraly Vorontsovtyń advokaty Ǵalym Nurpeiisov málimdedi. Onyń aitýynsha, tergeý aiaqtalǵanymen, qorǵaýshysyna aiyptaý aktisi áli tabystalmaǵan. Qujat tapsyrylǵannan keiin is sotqa jiberiledi.
Sonymen qatar Vorontsov Almatydaǵy tergeý izoliatorynda densaýlyǵyna bailanysty qajetti meditsinalyq kómek ala almai otyrǵanyn aitqan. Ol 17 tamyzda dosy Geniat Isinge jazǵan hatynda aiaǵyndaǵy sozylmaly aýrýy asqynǵanyn habarlaǵan.
«Men týraly áli de jazbalar jariialap júrsiń be? Maǵan múldem meditsinalyq kómek kórsetilmei jatqanyn jazshy. Aiaǵymdaǵy sozylmaly aýrýym — trofikalyq jara men posttromboflebit — áldeqashan asqynyp ketti. Aiaǵym qatty aýyrady, aýyrsynýdan uiyqtai almai júrmin. Dárigerlerge júginip jatyrmyn. Eshqandai reaktsiia joq. Eshqandai kómek kórsetilmeidi. Osyǵan bailanysty shaǵym jazdym. Biraq odan da nátije bolǵan joq. Maǵan shuǵyl túrde flebologtyń tekserýi men emi qajet», — dep jazǵan ol.
Advokattyń aitýynsha, Vorontsovtyń aiaǵynda buryn trofikalyq jara bolǵan. Aýrý emdelgenimen, qamaýdaǵy emotsionaldyq jaǵdaiyna bailanysty onyń qaita asqyný belgileri paida bolǵan. Qorǵaýshy densaýlyq jaǵdaiyn eskere otyryp, bultartpas sharany ózgertý týraly birneshe ret ótinish bergenin, alaida sottar ony qanaǵattandyrmaǵanyn aitty.
Vorontsov 13 aqpannan beri qamaýda otyr. Aqpan aiynda oǵan Qylmystyq kodekstiń 302-baby boiynsha esirtki tutynýǵa arnalǵan priton uiymdastyrý jáne 296-baby boiynsha esirtkini ótkizý maqsatynsyz saqtaý aiyptary taǵylǵan. Vorontsov taǵylǵan aiyptardy moiyndamaidy.
Buǵan deiin, mamyr aiynda, sot Vorontsovty psihiatriialyq kómek kórsetetin arnaiy meditsinalyq mekemege májbúrli túrde jiberý týraly sheshim qabyldaǵan. Ol Aktasedegi mekemede bolǵan. Keiin dárigerler onyń psihikalyq aýytqýlary joq degen qorytyndy jasap, shilde aiynda ony Almatydaǵy tergeý izoliatoryna qaitarǵan.
Iakov Vorontsov buǵan deiin Reseidiń Ýkrainaǵa basyp kirýin ashyq synap, soǵysqa qarsy úndeý jariialaǵan pravoslav din qyzmetkerleriniń qatarynda bolǵan. Sondai-aq ol Qazaqstanda Máskeý patriarhatyna baǵynbaityn táýelsiz pravoslav qaýymyn qurý bastamasyn kótergen. Osydan keiin 2023 jyly Resei pravoslav shirkeýi ony dini qyzmetten aiyrǵan.
Vorontsov ózine taǵylǵan esirtkige qatysty aiyptardy joqqa shyǵaryp, úiinen tabyldy delingen zattardyń ózine tiesili emes ekenin aitqan. Onyń pikirinshe, qylmystyq qýdalaý onyń dini jáne qoǵamdyq ustanymdarymen bailanysty.
Qazir qorǵaýshy tarap aiyptaý aktisiniń tabystalýyn kútýde. Osydan keiin is materialdary sotqa jiberilýi múmkin.
