Ózbekstan prezidentiniń úlken qyzy Gúlnár Karimovaǵa tiesili kommertsiialyq qurylymdardyń birinde joǵary laýazymda bolǵan Nurmuhammad Sadyqov 18 jylǵa bas bostandyǵynan aiyryldy.
Bul týraly «Ortalyq Aziiadaǵy adam quqyqtary» qaýymdastyǵynyń jetekshisi Nadejda Ataeva habarlady. Kei derek boiynsha, "Nýrik" esimdi laqap atymen tanymal Nurmuhammad Sadyqov uzaq jyldar boiy Ózbekstan prezidentiniń úlken qyzy Gúlnár Karimovanyń jeke esepshisi bolǵan.
Úsh jyl buryn Sadyqov Birikken Arab Ámirlikterinen ushyp kelgen bette Tashkent áýejaiynda tutqyndaldy. Oǵan qarjylyq alaiaqtyq jasady degen aiyp taǵyldy.
Esterińizge sala keteiik, eki jyl buryn Ózbekstannyń tergeý oryndary prezident qyzynyń iri telekommýnikatsiialyq kompaniialardan para alýyna qatysty jemqorlyq isterine bailanysy bar degen aiyppen Gúlnár Karimovanyń birqatar jaqyn adamyn ustaǵan edi. Bul jemqorlyq daýymen Qurama Shtattar jáne Eýropanyń birqatar eliniń tergeý oryndary ainalysýda. Tutqyndalǵandardyń arasynda Gúlnár Karimovanyń azamattyq kúieýi Rýstam Madýmarov pen onyń jeke kómekshisi Gaiane Avakian bar.
2014 jyldyń mamyrynda Madýmarov pen Avakiandy Ózbekstannyń Áskeri soty adam urlady degen aiyppen 9 jáne 6 jylǵa sottady.
Urlanǵan adam dál osy Nurmuhammad Sadyqov bolatyn. Nadejda Ataevanyń aitýynsha, Sadyqov jáne Gúlnár Karimovanyń isti bolǵan ózge de jaqyn adamdaryna qatysty barlyq sot otyrysy jabyq jaǵdaida ótken.
