Gúlmira Satybaldy 28 tamyzdaǵy sot otyrysynda sońǵy sózin aitpaitynyn málimdedi, - dep habarlaidy Dalanews.kz.
27 tamyzda ótken sot otyrysynda aiyptalýshy jaǵdaiy nashar ekenin aityp, sot otyrysyna qatyspady. Onyń múddesin advokaty Ásemgúl Danialova qorǵady.
Búgin Gúlmira Satybaldy tergeý izoliatorynan sot otyrysyna onlain rejimde qosyldy, biraq sot protsesi bastalar aldynda sýdia Martpek Kákimjanovtan ózin jiberýin, sot jaryssózderin onyń qatýysynsyz ótkizýin ótindi.
"Sizden bir ǵana nárse suraimyn, kúshińizdi jinańyz. Bul úsh ailyq marafon sizge, bárine, maǵan da qatty áser etkenin túsinemin. Sizge qylmystyq is júrgizý kodeksine sáikes búgin qandai rásim josparlanǵanyn túsindiremin. Keshe biz sot jaryssózin tyńdai bastadyq, sizdiń advokatyńyz sóiledi. Búgin zań boiynsha sizdiń de aiyptaý týraly óz ustanymyńyzdy jaryssózde aitýǵa quqyǵyńyz bar jáne zańda sot jaryssózdi aiaqtaǵannan keiin sottalýshynyń sońǵy sózin tyńdaýǵa kóshedi dep jazylǵan. Sondyqtan shydamdy bolyńyz, jarai ma?" - dedi Martpek Kákimjanov.
Gúlmira Satybaldy, rasynda da, jaǵdaiy nashar ekenin jáne protseske qatysa almaitynyn aitty. Ol sońǵy sózinen de bas tartty.
Sot aiyptaýshy tarap pen jábirlenýshilerdiń sózimen jalǵasty.
Aita keteiik, byltyr Gúlmira Satybaldyǵa eki ret sot úkimi shyqqan edi. 2023 jyly maýsymda Qyzylorda soty "Bótenniń múlkin iemdený jáne jymqyrý" baby boiynsha aiyptalǵan Gúlmira Satybaldyny 8 jylǵa bas bostandyǵynan aiyrǵan edi. Onyń aldynda Astana soty "Adam urlaý" (125-bap) jáne "Ózinshe bilik etý" (339-bap) baptary boiynsha aiyptalǵan Gúlmira Satybaldyny 7 jylǵa sottaǵan.
Bul joly Nazarbaevtyń nemere inisi Qairat Satybaldynyń burynǵy áieli Gúlmira Satybaldy bopsalaý jáne kásipkerdi zańsyz erkindiginen aiyrý isi boiynsha sotqa tartylyp otyr.
