Jasan qazirgi kúni álemge áigili kompaniiada injener bolyp isteidi. Buǵan deiin Dalanews.kz-ke shaǵyn suhbat bergen Jasan óziniń týǵan ólkesi jaiynda aityp bergen edi.
"Kir jýyp, kindik kesken jerim ShQO Kúrshim aýdany. Osy ólkeniń Qaratoǵai degen alaqandai aýylynda týyp óstim. Mektepten keiin Almatydaǵy S.Demirel atyndaǵy ýniversitettiń tabaldyryǵyn attadym. Osynaý oqý ornynda "Aqparatty júieler" mamandyǵy boiynsha bilim aldym", – deidi ol.
Osy aradan bakalavrdy támamdaǵan Jasan bilimin tolyqtyra túsýdi jón kóredi. Oqýyn aiaqtai sala Qazaq-britan tehnikalyq ýniversitetine dál osy mamandyq boiynsha magistratýraǵa túsedi.
Aitýynsha, alǵashqyda Google sekildi jahanǵa tanymal kompaniiada jumys isteimin dep múlde oilamaǵan, áitse de júreginiń túkpirinde mundai arman búgýli jatqanyn jasyrmaidy.
"Mundai dárejedegi kompaniiaǵa jumysqa ornalasý naǵyz synaq. Aqparattyq tehnologiialar salasyn jetik meńgergeniń azdyq etedi, dúnietanymyń, kózqarasyń Google-dyń deńgeiine sai bolýy kerek.
Shyny kerek, meniń bul salada azdy-kópti tájiribem bar edi. Magistratýradan keiin AQSh-ta startap salasynda azdap eńbek etkenmin. Sol jaqta jinaǵan tájiribem Google-ge jumysqa turýǵa sebepshi boldy", – deidi talantty jas.
Onyń atap ótkenindei, osynaý kompaniiaǵa qyzmetke ornalasqan árbir qyzmetkerdiń ainalasyna tez boi úiretip, beiimdelýi úshin kásibi dárister ótkiziledi.
«Mundai májiliste Google-dyń qurylý kezeńinen bastap, onda qyzmet isteý, mamannyń maqsaty pen muraty týraly, sonymen birge ujymmen til tabysý jolyndaǵy paidaly keńester beriledi. Men úshin bul dáristiń kómegi kóp boldy», – deidi ol.
Google kompaniiasyna jumysqa turý úshin jas talanttar qandai talapqa sai bolýy kerek?
Jasan Baipaqbaevtyń aitýynsha alpaýyt kompaniiaǵa jumysqa turýdy armandaityn qazaq jastary ǵylymǵa qumbyl kóńil bólgeni jón. Birinshi kezekte esep shyǵarý deńgeiine nazar aýdarylady. Sonymen qatar túrli startapta istep tájiribe jinaǵany jón. Google tájiribesi tolyspaǵan mamanǵa esigin aiqara asha salmaidy.
"Mundai kompaniiada qyzmet isteýdiń taǵy bir jaqsy jeri mamanǵa barlyq jaǵdaidyń jasalýy. Óz basym muny durys úrdis dep esepteimin. Google-degi mamandar úsh mezgil ystyq tamaqpen jáne qyzmettik kólikpen qamtamasyz etilgen», -deidi ol.
