Qazaqstan Ulttyq Olimpiadalyq komitetiniń prezidenti Gennadii Golovkin Halyqaralyq boks federatsiiasy (World Boxing) jańa Olimpiadalyq komissiiasynyń tóraǵasy atandy, – dep habarlaidy Dalanews.kz.
Qazaqstannyń Ulttyq Olimpiadalyq komitetiniń baspasóz qyzmetiniń habarlaýynsha, jumys barysynda Qazaqstan UOK basshysy World Boxing qyzmetiniń ashyqtyǵyn qamtamasyz etý máselelerine qatysty halyqaralyq sporttyq uiymdarmen birlese jumys isteýge kóńil bóledi.
Sonymen qatar onyń komissiia basshysy retindegi basty mindetteriniń biri – boksty Olimpiada oiyndarynyń baǵdarlamasynda qaldyryp, World Boxing uiymyn HOK moiyndaýy úshin Halyqaralyq Olimpiada komitetimen tyǵyz áriptestik ornatý bolmaq.
Aita ketelik, World Boxing Gennadii Golovkinniń kandidatýrasyn alǵashqylardyń biri bolyp bekitti. Jaqyn arada Olimpiadalyq komissiia quramyna sport áleminiń ózge de ókilderi enip, boksty Olimpiadalyq qozǵalys ortasynda qaldyrýǵa arnalǵan iri josparlardy júzege asyrýǵa kúsh salady.
World Boxing 2023 jyldyń sáýirinde quryldy. Qazirgi tańda uiym quramyna álemniń 44 memleketindegi Ulttyq federatsiialar engen.
Memlekettik qyzmettegi mansaby
Golovkin – 2024 jyldyń 27 aqpany Qazaqstan Ulttyq Olimpiada komitetiniń prezidenti qyzmetine taǵaiyndaldy. Sportshy óz ókilettigin merziminen buryn bosaǵan Timýr Qulybaevtyń ornyna keldi.
"Ózderińiz biletindei, men saiasatker de, sheneýnik te emespin. Men óz nietimdi sózben emes, ispen dáleldeýge daǵdylanǵanmyn. Basty mindetterdiń biri – halyqaralyq qatynastardy nyǵaitý", – dedi boksshy.
Golovkin – IBF, WBA jáne IBO nusqalary boiynsha eki dúrkin álem chempiony. Ol Olimpiada oiyndarynyń kúmisin de jeńip aldy.
