Almatydaǵy «№90 mektep-litseii» ustazdary men oqýshylary álemniń úzdik muǵalimderiniń qataryna engen, GLOBAL TEACHER halyqaralyq mártebesine ie bolǵan Tatiana Beloýsovamen kezdesti, dep habarlaidy Dala News.
Is-shara aiasynda Tatiana Beloýsova óz tájiribesimen bólisip, zamanaýi pedagogikanyń negizgi tásilderi týraly aityp beredi, sondai-aq GLOBAL TEACHER bedeldi halyqaralyq mártebesine ie bolý erekshelikterin túsindirdi. Qatysýshylar ózderin tolǵandyrǵan suraqtaryn qoiyp, bilim berý salasyndaǵy ózekti máselelerdi talqylap, oqytý sapasyn arttyrýǵa arnalǵan praktikalyq usynystar aldy.
№90 mektep-litseiiniń direktory Bulbul Rasbekqyzynyń aitýynsha bul is-shara pedagogtardyń kásibi qaýymdastyǵyn damytýǵa, oqýshylardyń shyǵarmashylyq bastamalaryn qoldaýǵa jáne mekteptiń innovatsiialyq ári mádeni bilim berý ortalyǵy retindegi imidjin nyǵaitýǵa baǵyttalǵan.
«Bul kezdesý biz úshin óte mańyzdy. Óitkeni Tatiana Gennadevna zeinetker bola tura, osyndai úlken konkýrsty jeńip alyp jatyr. Jas mamandardy, stýdentterdi mektepke tartý, pedagog mártebesin kóterýge óte paidaly dep oilap, janymyzda júrgen qaharmandardy mektepke shaqyrý boldy maqsatymyz. Olardyń jetistikke qalai jetkenin aitý áriptesterimizge paidaly, múmkin oqýshylarymyzdyń arasynda bolashaqta mamandyqtaryn muǵalimdikpen jalǵastyratyn balalar bar shyǵar. Bizge jaqsy muǵalimder kerek. Bizdiń aldymyzda otyrǵan balalar óte talantty. Bul arnaiy fizika-matematikalyq litsei. Qazir ásirese matematika, fizika himiia pániniń muǵalimderi az. Sondyqtan bul bir jaǵynan balalarymyzǵa kásiptik baǵdar retinde jasalyp otyrǵan is-shara. Ári búgin mektebimizde qazaq teatrynyń tusaýkeseri. Sol teatrymyzdy osyndai keremet adamdar ashyp bersin degen nietpen de shaqyryp otyrmyz», deidi Bulbul Rasbekqyzy.
Aita keteiik, Almatydaǵy №95 mektep-litseidiń himiia páni muǵalimi, «Qazaqstannyń úzdik ustazy – 2024» qurmetti ataǵynyń iegeri Tatiana Beloýsova Global Teacher Prize 2025-2026 halyqaralyq baiqaýynyń qorytyndysy boiynsha álemniń eń úzdik 50 pedagoginiń qataryna endi. Álemniń eń úzdik 50 muǵaliminiń resmi tizimi 2025 jyly 15 jeltoqsanda Global Teacher Prize resmi saitynda jariialandy.
Keiin ustazdy Memleket basshysy quttyqtap, joǵary marapat óskeleń urpaqty tárbieleý men oqytýǵa baǵyttalǵan kópjyldyq jasampaz eńbeginiń nátijesi ekenin atap ótken edi.
«№90 mektep-litsei Almaty qalasyndaǵy áigili oqý oryndarynyń biri. Mektep ujymymen, oqýshylarmen kezdesip, tájiribe bólisý meni árqashan shabyttandyrady. Qazaqstan Global Teacher Prize bes ret qatysyp, úsh ret úzdik 50 pagagogtyń qataryna kirdi. Aldaǵy ýaqytta úzdik 10-dyqqa kirse dep tileimiz. Buǵan ustazdar qaýymynyń tolyq múmkindigi bar. Ustazdarymyzdyń osyndai kezdesýlerden baǵyt alyp, qatysyp, jeńimpazdar qataryna qosylýyna tilektespin. №90 mektep-litsei basshylyǵyna, ujymyna alǵys aitamyn», deidi Tatiana Beloýsova.
Is-sharanyń sońynda mektepte «Shyraq» qazaq teatry ashylyp, balalardyń súiikti shyǵarmasy «Meniń atym Qoja» sahnalandy. Qyzyl lentany qurmetti qonaq Tatiana Beloýsova hanym qiyp, jas ónerpazdarǵa sáttilik tiledi.
Aita keteiik, №90 mamandandyrylǵan daryndy balalarǵa arnalǵan fizika-matematika baǵytyndaǵy litsei Almaty qalasyndaǵy eń tanymal oqý oryndarynyń biri. Eń úzdik ustazdardyń biri Bulbul Ospanbek basqaratyn mektepte búginde 1256 bala bilim alady.
