الماتىداعى «№90 مەكتەپ-ليسەيى» ۇستازدارى مەن وقۋشىلارى الەمنىڭ ۇزدىك مۇعالىمدەرىنىڭ قاتارىنا ەنگەن، GLOBAL TEACHER حالىقارالىق مارتەبەسىنە يە بولعان تاتيانا بەلوۋسوۆامەن كەزدەستى، دەپ حابارلايدى Dala News.
ءىس-شارا اياسىندا تاتيانا بەلوۋسوۆا ءوز تاجىريبەسىمەن ءبولىسىپ، زاماناۋي پەداگوگيكانىڭ نەگىزگى تاسىلدەرى تۋرالى ايتىپ بەرەدى، سونداي-اق GLOBAL TEACHER بەدەلدى حالىقارالىق مارتەبەسىنە يە بولۋ ەرەكشەلىكتەرىن ءتۇسىندىردى. قاتىسۋشىلار وزدەرىن تولعاندىرعان سۇراقتارىن قويىپ، ءبىلىم بەرۋ سالاسىنداعى وزەكتى ماسەلەلەردى تالقىلاپ، وقىتۋ ساپاسىن ارتتىرۋعا ارنالعان پراكتيكالىق ۇسىنىستار الدى.
№90 مەكتەپ-ليسەيىنىڭ ديرەكتورى بۇلبۇل راسبەك قىزىنىڭ ايتۋىنشا بۇل ءىس-شارا پەداگوگتاردىڭ كاسىبي قاۋىمداستىعىن دامىتۋعا، وقۋشىلاردىڭ شىعارماشىلىق باستامالارىن قولداۋعا جانە مەكتەپتىڭ يننوۆاسيالىق ءارى مادەني ءبىلىم بەرۋ ورتالىعى رەتىندەگى ءيميدجىن نىعايتۋعا باعىتتالعان.
«بۇل كەزدەسۋ ءبىز ءۇشىن وتە ماڭىزدى. ويتكەنى تاتيانا گەنناديەۆنا زەينەتكەر بولا تۇرا، وسىنداي ۇلكەن كونكۋرستى جەڭىپ الىپ جاتىر. جاس مامانداردى، ستۋدەنتتەردى مەكتەپكە تارتۋ، پەداگوگ مارتەبەسىن كوتەرۋگە وتە پايدالى دەپ ويلاپ، جانىمىزدا جۇرگەن قاھارمانداردى مەكتەپكە شاقىرۋ بولدى ماقساتىمىز. ولاردىڭ جەتىستىككە قالاي جەتكەنىن ايتۋ ارىپتەستەرىمىزگە پايدالى، مۇمكىن وقۋشىلارىمىزدىڭ اراسىندا بولاشاقتا ماماندىقتارىن مۇعالىمدىكپەن جالعاستىراتىن بالالار بار شىعار. بىزگە جاقسى مۇعالىمدەر كەرەك. ءبىزدىڭ الدىمىزدا وتىرعان بالالار وتە تالانتتى. بۇل ارنايى فيزيكا-ماتەماتيكالىق ليسەي. ءقازىر اسىرەسە ماتەماتيكا، فيزيكا حيميا ءپانىنىڭ مۇعالىمدەرى از. سوندىقتان بۇل ءبىر جاعىنان بالالارىمىزعا كاسىپتىك باعدار رەتىندە جاسالىپ وتىرعان ءىس-شارا. ءارى بۇگىن مەكتەبىمىزدە قازاق تەاترىنىڭ تۇساۋكەسەرى. سول تەاترىمىزدى وسىنداي كەرەمەت ادامدار اشىپ بەرسىن دەگەن نيەتپەن دە شاقىرىپ وتىرمىز»، دەيدى بۇلبۇل راسبەك قىزى.
ايتا كەتەيىك، الماتىداعى №95 مەكتەپ-ليسەيدىڭ حيميا ءپانى ءمۇعالىمى، «قازاقستاننىڭ ۇزدىك ۇستازى – 2024» قۇرمەتتى اتاعىنىڭ يەگەرى تاتيانا بەلوۋسوۆا Global Teacher Prize 2025-2026 حالىقارالىق بايقاۋىنىڭ قورىتىندىسى بويىنشا الەمنىڭ ەڭ ۇزدىك 50 پەداگوگىنىڭ قاتارىنا ەندى. الەمنىڭ ەڭ ۇزدىك 50 ءمۇعالىمىنىڭ رەسمي ءتىزىمى 2025 جىلى 15 جەلتوقساندا Global Teacher Prize رەسمي سايتىندا جاريالاندى.
كەيىن ۇستازدى مەملەكەت باسشىسى قۇتتىقتاپ، جوعارى ماراپات وسكەلەڭ ۇرپاقتى تاربيەلەۋ مەن وقىتۋعا باعىتتالعان كوپجىلدىق جاسامپاز ەڭبەگىنىڭ ناتيجەسى ەكەنىن اتاپ وتكەن ەدى.
«№90 مەكتەپ-ليسەي الماتى قالاسىنداعى ايگىلى وقۋ ورىندارىنىڭ ءبىرى. مەكتەپ ۇجىمىمەن، وقۋشىلارمەن كەزدەسىپ، تاجىريبە ءبولىسۋ مەنى ءارقاشان شابىتتاندىرادى. قازاقستان Global Teacher Prize بەس رەت قاتىسىپ، ءۇش رەت ۇزدىك 50 پاگاگوگتىڭ قاتارىنا كىردى. الداعى ۋاقىتتا ۇزدىك 10-دىققا كىرسە دەپ تىلەيمىز. بۇعان ۇستازدار قاۋىمىنىڭ تولىق مۇمكىندىگى بار. ۇستازدارىمىزدىڭ وسىنداي كەزدەسۋلەردەن باعىت الىپ، قاتىسىپ، جەڭىمپازدار قاتارىنا قوسىلۋىنا تىلەكتەسپىن. №90 مەكتەپ-ليسەي باسشىلىعىنا، ۇجىمىنا العىس ايتامىن»، دەيدى تاتيانا بەلوۋسوۆا.
ءىس-شارانىڭ سوڭىندا مەكتەپتە «شىراق» قازاق تەاترى اشىلىپ، بالالاردىڭ سۇيىكتى شىعارماسى «مەنىڭ اتىم قوجا» ساحنالاندى. قىزىل لەنتانى قۇرمەتتى قوناق تاتيانا بەلوۋسوۆا حانىم قيىپ، جاس ونەرپازدارعا ساتتىلىك تىلەدى.
ايتا كەتەيىك، №90 مامانداندىرىلعان دارىندى بالالارعا ارنالعان فيزيكا-ماتەماتيكا باعىتىنداعى ليسەي الماتى قالاسىنداعى ەڭ تانىمال وقۋ ورىندارىنىڭ ءبىرى. ەڭ ۇزدىك ۇستازداردىڭ ءبىرى بۇلبۇل وسپانبەك باسقاراتىن مەكتەپتە بۇگىندە 1256 بالا ءبىلىم الادى.
