Memleket basshysy birqatar jas ǵalymǵa páter kiltterin tabystap, ǵylymdy damytý memlekettik saiasattyń negizgi basymdyqtarynyń biri bolyp qala beretinin atap ótti. Baspana berý týraly sheshim zertteýshilerdi áleýmettik qoldaýǵa ǵana emes, eldegi turaqty ǵylymi ekojúieni qalyptastyrýǵa baǵyttalǵan júieli sharalardyń bir bóligi boldy, dep habarlaidy Dalanews.kz
Páter alǵandardyń qatarynda Qazaqstannyń qoldanbaly jáne irgeli áleýetin qalyptastyryp júrgen ártúrli ǵylym salalarynyń ókilderi bar.
31 jastaǵy Álisher Mútáli Iadrolyq fizika institýtynda jumys isteitin fizik. Ol iadrolyq energetikaǵa arnalǵan materialdardyń radiatsiialyq tózimdiligin zertteýge mamandanǵan.
7 jyldan astam ǵylymi tájiribesi bar, halyqaralyq jýrnaldarda 20-dan astam maqalasy jariialanyp, 20 ǵylymi konferentsiiada baiandama jasaǵan. Ol halyqaralyq granttardyń iegeri jáne beiindi ǵylymi forýmdardyń laýreaty. Onyń zertteýleri bolashaq energetikasy úshin mańyzdy bolyp tabylatyn radiatsiialyq áserlerdi modeldeýge baǵyttalǵan.
Indira Músilimova himiia salasyndaǵy qoldanbaly baǵytty usynady. Onyń zertteýleri sýdy tazartý jáne kúrdeli qospalardy bólýde qoldanylatyn membranalyq tehnologiialardy damytýmen bailanysty.
Indira innovatsiialyq materialdar jasaý jobalarynyń ǵylymi jetekshisi.
«Qýanyshymda shek joq. Jańa páter aldyq. Jas ǵalymdarymyzǵa osyndai qoldaý kórsetilip jatqanyna óte rizamyz. Prezidentimizge alǵys aitamyz», - dedi ol.
Medet Tóleýbaev meditsina salasynda 16 jyldyq tájiribesi bar ǵalym, ǵylym men praktikany qatar alyp júr. Onyń zertteýleri klinikalyq meditsina máselelerine, sonyń ishinde diabettik taban asqynýlaryna arnalǵan. Ol kásibi marapattardyń iegeri jáne meditsinalyq bilim berý júiesinde ǵylymi baǵytty damytyp keledi.
«Ǵylym salasynda júrgenime 12 jylboldy. Bul men úshin úlken mártebe. Eń aldymen Memleket basshysy Qasym-Jomart Kemelulyna alǵys aitqym keledi», - dedi Rahiia Elnazarqyzy.
Sondai-aq, elordada jeke baspanaly bolǵan jas ǵalymdardyń biri Elmira Bazylhanova. Ol Ǵylym qyzmetkerleri kúni qarsańynda mundai úlken syilyqty kútpegenin aitty.
«Elimiz Jańa Konstitýtsiiany qabyldaǵan osynaý tarihi kezeńde Prezidenttiń qolynan jańa páter kiltin aldyq. Mundai úlken syilyq alamyz dep oilamadyq. Aqordada kiltti alǵanda qatty qýandyq. Qazir jańa páterimizdi kórip, tolqyp turmyz. Sheksiz rizamyz» - dedi ol.
Osylaisha, baspana alǵandardyń qatarynda el úshin mańyzdy salalar -energetika, tarih, ekologiia, meditsina jáne aýyl sharýashylyǵynda eńbek etip júrgen ǵalymdar bar. Olardyń ǵylymi baǵyttary memlekettik saiasattyń basymdyqtaryn kórsetedi.
Eske sala keteiik, ótken jyly 271 jas ǵalym baspanaly boldy. 2025 jyly ǵylymi syilyqtar taǵaiyndalyp, halyqaralyq taǵylymdamalarǵa ondaǵan stipendiia men granttar bólindi.
Sondai-aq, ǵylymi dárejeler úshin qosymsha aqylar engizilip, zertteýlerge investitsiia salatyn biznes úshin salyqtyq yntalandyrý sharalary qabyldandy.
