Ǵylym qyzmetkerleri kúni qarsańynda «Qazaqmys» Tobynda ónertapqyshtyq bastamalardy damytýǵa baǵyttalǵan iri joba bastalady. Joba qyzmetkerlerdiń usynysyn jınaýmen ǵana shektelmeı, ınovasıalyq qyzmetti júıeli ekojúıege aınaldyrýdy kózdeıdi. Ǵylymı izdenis pen jetildirýlerdi bir arnaǵa toǵystyrýdy maqsat tutatyn joba kompanıanyń basty aktıvi – jumyskerlerdiń zıatkerlik áleýetin damytýǵa basymdyq beredi.
Joba dástúrli ónertapqyshtyq baıqaý sheńberinen shyǵyp, jumyskerlerdiń praktıkalyq tájirıbesin tereń ǵylymı tásilmen ushtastyratyn ózara árekettestiktiń biregeı modelin qalyptastyrady.
Jobanyń ǵylymı baǵyty árbir bastamany qurylymyna qaraı tıisinshe damytady. Ideıany ónerkásiptik standartqa aınaldyrý úderisi myna kezeńderdi qamtıdy:
- ǴZTKJ áleýetin irikteý: tereń ǵylymı negizdeýdi qajet etetin ıdeıalarǵa basymdyq berý.
- Ǵylymı-tehnıkalyq keńestiń (ǴTK) jumysy: tereń zertteý júrgizý jáne joǵary tehnologıalyq sheshimderdi ázirleý.
- Synaqtan ótkizý: ǵylymı boljamdy shynaıy óndiristik jaǵdaıda mindetti túrde tekserý.
Mańyzdy kezeńderdiń biri – zıatkerlik menshikti qorǵaý. Kompanıa ınovasıalardy strategıalyq ınvestısıa retinde qarastyrady, sondyqtan úzdik tujyrymdamalardyń ákeletin jańalyǵy saraptalyp, korporatıvtik deńgeıde patent jáne avtorlyq quqyq retinde tirkeledi. Bul zertteýler men ázirlemeler (R&D) salasyndaǵy qundy aktıvter qorjynyn qalyptastyrýǵa múmkindik beredi.
Mundaı tásildiń tıimdiligi is júzinde dáleldendi. Inovasıalar júıesi «Qazaqmys Smeltıng» bólimshesinde synaqtan sátti ótti. Nebary 1 jyl 8 aı ishinde qyzmetkerler 500 tyń ıdeıa usyndy, onyń 12%-y iske asyryldy. Bul shamamen 3 mlrd teńge ekonomıkalyq paıda ákeldi. Al ıdeıa avtorlary laıyqty syıaqyǵa ıe boldy.
Jańa jobany iske qosý osy baǵyttaǵy jumysty Top kóleminde júıelep, ǵylym men óndiristiń turaqty damýy men qaýipsizdik úshin ózara tyǵyz baılanysta áreket etetin zamanaýı ınovasıalyq mádenıet qalyptastyrady.
