2025 jyldyń 19 tamyz kúni Abai atyndaǵy Qazaq ulttyq pedagogikalyq ýniversitetinde QR Ǵylym jáne joǵary bilim ministri Saiasat Nurbek Almaty qalasynyń turǵyndarymen kezdesý ótkizdi, dep habarlaidy Dalanews.kz.
Ǵylym jáne joǵary bilim salasyn damytý máselelerine qatysty ózekti taqyryptar talqylanǵan kezdesýge qala turǵyndary, professor-oqytýshylar quramy men belsendi jastar qatysty.
Kezdesýde kóterilgen negizgi máseleler retinde QR joǵary bilim jáne ǵylymdy damytýdyń 2023-2029 jyldarǵa arnalǵan tujyrymdamasyna erekshe nazar aýdarylyp, joǵary bilim berý, jasandy intellekt jáne tsifrlyq bilim, AI-SANA jobasy, infraqurylym men jastardy qoldaý, ǵylymi jobalardy qarjylandyrýdyń qajettigi ataldy. Sonymen qatar jalaqy men áleýmettik kepildikterdi arttyrý, stýdentter men jas ǵalymdardyń akademiialyq utqyrlyǵyn keńeitý, qazaqstandyq JOO-nyń halyqaralyq reitingterdegi ornyn jaqsartý jáne bilim berý baǵdarlamalaryn jańa tehnologiialarmen jańartý máseleleri de talqylandy.
Ministr Saiasat Nurbek jiynda aitylǵan ár másele boiynsha atqarylyp jatqan jumystarǵa toqtaldy. Onyń aitýynsha, demografiialyq ósimge bailanysty joǵary bilim berý salasyna túsetin júkteme artyp keledi.
"Úsh jyl buryn biz 620 myń stýdentpen bastaǵanbyz. Qazirdiń ózinde 680 myńnan astam stýdent oqyp jatyr. Al 2029-2030 jyldarǵa qarai, bizdiń boljam boiynsha, stýdentter sany 1 millionǵa jetedi dep otyrmyz. Infraqurylym, tsifrlyq platformalar, úzdiksiz bilim, Coursera tárizdi halyqaralyq platformalarmen seriktestikter - munyń bári osy demografiialyq ósimge tikelei bailanysty", - dep atap ótti ministr.
Basqosýda stýdentterdi jataqhanamen qamtý máselesi de basty nazarda boldy. Bul týraly:
"Almaty qalasynda arnaiy Ahýaldyq ortalyq ashyldy, ol arqyly kez kelgen stýdent táýliktiń kez kelgen ýaqytynda jataqhana máselesi boiynsha kómekke júgine alady. Mundai sharalar jańa oqý jyly qarsańynda eshbir stýdentti baspanasyz qaldyrmaýdy maqsat etedi", - dedi ministr Saiasat Nurbek.
Almaty jurtshylyǵynyń nazaryna Memleket basshysynyń 2023 jylǵy 1 qyrkúiektegi Joldaýy aiasynda Ministrlik joǵary oqý oryndary bazasynda jasandy intellekt baǵytynda kadrlar daiarlaý mindetin iske asyrý jumystarynyń aǵymdaǵy nátijeleri, "Keleshek" biryńǵai erikti jinaqtaý júiesi, "Mamandyǵym - Bolashaǵym" jobasynyń júzege asyrylýy syndy ózekti taqyryptar jóninde tyń aqparattar legi usynyldy.
Sondai-aq resmi bólimnen keiin ministrdiń jeke qabyldaýy ótip, onda birneshe turǵyn ózderiniń jekelegen máselelerin tikelei jetkizý múmkindigine ie boldy. Jergilikti turǵyndar ministrmen osyndai ashyq júzdesý formatynda pikirlesýge múmkindik týǵanyna rizashylyq bildirip, ǵylym men bilim salasyndaǵy ózgeristerge belsene atsalysýǵa daiyn ekenderin kórsetti.
