Almaty oblysynyń ákimi qyzmetine general-leitenant Shyńǵys Árinov taǵaiyndaldy. Buǵan deiin Prezident kúzeti men Tótenshe jaǵdailar ministrliginiń tizginin ustaǵan sheneýnik endi ózi dúniege kelgen óńirge basshylyq etedi. Osyǵan orai Dalanews.kz redaktsiiasy jańa oblys ákiminiń eńbek jolyna jáne qyzmettik ósý satysyna sholý jasady.
Shyńǵys Árinov 1983 jylǵy 29 qazanda Almaty oblysynda dúniege kelgen. Derekterge súiensek, ol Talǵardaǵy 2 mektepte bilim alǵan. Jańa ákim qazir 42 jasta.
Úsh joǵary oqý ornyn támamdaǵan
Árinovtiń alǵan bilimi birneshe salany qamtidy. Ol ál-Farabi atyndaǵy Qazaq ulttyq ýniversitetinde halyqaralyq qatynastar mamandyǵy boiynsha oqyǵan.
Budan keiin Qazaq eńbek jáne áleýmettik qatynastar akademiiasyn “Quqyqtaný” mamandyǵy boiynsha támamdaǵan. Sondai-aq Azamattyq aviatsiia akademiiasynda tasymaldy jáne qozǵalysty uiymdastyrý, kólikti paidalaný salasy boiynsha bilim alǵan.
Memlekettik kúzettegi 18 jyl
Shyńǵys Árinov 2006 jyldan 2022 jylǵa deiin Qazaqstannyń Memlekettik kúzet qyzmetinde túrli ofitserlik jáne basshylyq laýazymdardy atqarǵan.
2022 jyly 6 qańtarda Prezident ókimimen Árinov Memlekettik kúzet qyzmeti bastyǵynyń orynbasary – Prezident kúzeti qyzmetiniń bastyǵy bolyp taǵaiyndaldy. Bul laýazymda ol Memleket basshysynyń qaýipsizdigin qamtamasyz etýge jaýapty qurylymdy basqardy.
Osylaisha, Árinov 2006 jyldan 2024 jylǵa deiin, jalpy 18 jylǵa jýyq ýaqytyn memlekettik kúzet júiesinde ótkizdi. Sonyń keiingi eki jylynda Prezident kúzeti qyzmetin basqardy.
Ol II jáne III dárejeli “Elbasynyń qaýipsizdigin aibyndy atqarǵany úshin” medaldarymen, “Qazaqstan Respýblikasy Memlekettik kúzet qyzmetine 25 jyl” jáne “Qazaqstan Táýelsizdigine 30 jyl”mereitoilyq medaldarymen marapattalǵan.
38 jasynda general atandy
2022 jylǵy 6 mamyrda Shyńǵys Árinovke Memlekettik kúzet qyzmetiniń general-maiory arnaýly ataǵy berildi. Ol kezde Árinov 38 jasta edi.
Al 2025 jylǵy qazanda oǵan general-leitenant ataǵy berildi. Árinov úsh jarym jylǵa jýyq ýaqytta general-maiordan general-leitenant shenine deiin kóterildi.
Prezident kúzetinen ministrlikke aýysty
2024 jylǵy 6 aqpanda Shyńǵys Árinovtiń qyzmettik jolynda kúrt betburys boldy. Prezident Qasym-Jomart Toqaev ony Tótenshe jaǵdailar ministri etip taǵaiyndady. Buǵan deiin tótenshe jaǵdailar, órt sóndirý nemese azamattyq qorǵanys salasynda jumys istemegen kúshtik qurylym ókili osylaisha Úkimet quramyna endi.
Ministr qyzmetine kiriskennen keiin Árinov vedomstvonyń tiimdiligin arttyrýdy, qutqarýshylardyń turǵyn úi máselesin sheshýdi, materialdyq-tehnikalyq bazany jańartýdy jáne jemqorlyqpen kúresti negizgi mindetteriniń qataryna engizdi.
TJM-de qandai ózgerister boldy?
Shyńǵys Árinovtiń Tótenshe jaǵdailar ministrligin basqarǵan ýaqyty vedomstvony jańǵyrtýǵa baǵyttalǵan birqatar jobamen erekshelendi. Iaǵni, Tótenshe jaǵdailar ministrliginiń qurylymy qaita qaralyp, shalǵai eldi mekenderdegi qutqarý júiesin damytýǵa basymdyq berildi.
“Aýyl qutqarýshylary” baǵdarlamasy aiasynda 237 erikti órt sóndirý beketi salyndy. Olar shamamen 700 eldi mekenniń qaýipsizdigin qamtamasyz etedi. Sonymen birge jańa ámbebap qutqarý qurylymdary, aviatsiia jáne teńiz jasaqtary qurylyp, halyqty jappai habardar etý júiesin jańǵyrtý jumystary júrgizildi.
Materialdyq-tehnikalyq bazany jańartý jumystary da jandandy. Órt sóndirý jáne qutqarý bólimshelerine jańa arnaiy tehnika berilip, áýe kemelerin satyp alý qolǵa alyndy. 2024 jyly el aýmaǵynda 14 jańa órt sóndirý deposy paidalanýǵa berildi. Qutqarýshylardyń qyzmettik kiimi jańartylyp, olardyń áleýmettik jáne turmystyq jaǵdaiyn jaqsartýǵa kóńil bólindi.
Árinovtiń tusynda halyqty tótenshe jaǵdai týraly jappai habardar etý júiesin damytý, tabiǵi órtterdi erte anyqtaý tehnologiialaryn biriktirý jáne TJM Ahýaldyq ortalyǵynyń múmkindikterin keńeitý jumystary júrgizildi. Ministrliktiń qurylymy qaita qaralyp, óńirlik bólimshelerdi kúsheitýge basymdyq berildi.
2024 jylǵy aýqymdy sý tasqyny Árinov úshin ministr retindegi alǵashqy ári eń kúrdeli synaq boldy. Tótenshe jaǵdailar ministrliginiń kúshteri turǵyndardy evakýatsiialaý, eldi mekenderdi sýdan qorǵaý jáne zardap shekken aimaqtarǵa kómek jetkizý jumystaryna jumyldyryldy. Keiingi jyldary sý tasqynyna aldyn ala daiyndalý, qaýipti aýmaqtardy baqylaý jáne injenerlik qorǵanys sharalaryn erterek júrgizý tártibi kúsheitildi.
Nátijesinde, Árinov basqarǵan kezeńde TJM-niń aýyldyq jerlerdegi bólimsheler jelisi keńeiip, tehnikasy jańartylyp, tótenshe jaǵdailardy erte anyqtaý men jedel áreket etý júiesi jetildirildi. Bul jumystar onyń azamattyq qorǵanys salasyndaǵy tájiribesi bolmaǵanyna qaramastan, qysqa merzim ishinde vedomstvonyń basqarý tetikterin meńgerip, birneshe mańyzdy jobany iske asyra alǵanyn kórsetti.
Týǵan óńirine oralǵan ákim
Shyńǵys Árinovtiń Almaty oblysyna ákim bolyp taǵaiyndalýy onyń mansabyndaǵy úshinshi iri kezeń sanalady. Almaty oblysynyń ákimi laýazymy sheneýnik úshin jergilikti basqarýdaǵy alǵashqy tájiribe bolmaq.
Aita keteiik, Almaty oblysy – halyq sany jyldam ósip jatqan, infraqurylymdyq jáne áleýmettik máseleleri kúrdeli óńirlerdiń biri. Munda mektep tapshylyǵy, úsh aýysymdy oqý, sý jáne elektr jelileriniń tozýy, Almaty mańyndaǵy retsiz qurylys, kólik qatynasy, aýyl sharýashylyǵy men týrizmdi damytý máseleleri ózekti.
Talǵarda týyp-ósken jańa ákimge bul problemalar bóten emes deýge bolady. Degenmen kúshtik qurylymdarda qalyptasqan qatań basqarý tásiliniń azamattyq salada qanshalyqty tiimdi bolatynyn onyń aldaǵy jumysy kórsetedi.
