Gaz urlap, túrmege tústi
Túrkistan oblysy Túlkibas aýdany M.Jarymbetov aýylynda kináli adamǵa iri aiyppul salynyp qana qoimai, qylmystyq jaýapkershilikke de tartyldy.
Bul qylmystyq oqiǵa bylai damydy. Ótken jyldyń qańtar aiynda O. esimdi azamat tutynatyn tabiǵi gaz úshin aqsha tólemeýdiń jolyn tapqan. Ózine jáne ainalasyndaǵylarǵa qaýip tóngenine qaramastan, ol úiiniń tusynan ótip turǵan gaz qubyryn eki jerden tesip, oǵan temir qubyr, rezeńke shlang bekitip, "QazTransGaz Aimaqqa" tiesili gazdy zańsyz paidalana bastaǵan.
Eń qyzyǵy, uryny gaz sharýashylyǵynyń mamandary eki ret ustap, gazben jabdyqtaýdan ajyratqan. Biraq azamat O. taǵy da kórshi gaz qubyryna zańsyz qosylyp, kógildir otyndy urlap jaǵýdy jalǵastyrdy. Bir jyl ishinde osyndai jolmen urlanǵan gaz kólemi 400 myń teńgege jýyqtaǵan
Aqyr sońynda, qylmystyq is qozǵalyp, is sotqa jetti. Sot azamat O. Qazaqstan Respýblikasy Qylmystyq kodeksiniń 188-babynyń 1-bóliginde kózdelgen qylmystyq quqyq buzýshylyq jasaǵany úshin kináli dep tanydy jáne oǵan bir jyl merzimge bas bostandyǵynan aiyrý túrindegi jaza taǵaiyndady. Bul rette, sot gaz taratýshy mekemeniń azamattyq talap-aryzyn tolyq qanaǵattandyrdy.
Aita ketý kerek, kógildir otyndy urlaý faktisinen basqa, turmysta gazdy paidalaný erejelerin buzý eń aýyr zardaptarǵa ákelýi múmkin. Paidalaný erejelerin, qaýipsizdik tehnikasyn saqtamai ruqsatsyz oiyp qosý gazdyń taralýyna, baiaý jinalǵan jerdegi kontsentratsiia artqan kezde joiqyn jarylysqa ákelýi múmkin. Onyń saldary aýyr, tipti órt bolyp, adam ólimine soqtyrýy ábden múmkin.
