تۇركىستان وبلىسى تۇلكىباس اۋدانى م.جارىمبەتوۆ اۋىلىندا كىنالى ادامعا ءىرى ايىپپۇل سالىنىپ قانا قويماي، قىلمىستىق جاۋاپكەرشىلىككە دە تارتىلدى.
بۇل قىلمىستىق وقيعا بىلاي دامىدى. وتكەن جىلدىڭ قاڭتار ايىندا و. ەسىمدى ازامات تۇتىناتىن تابيعي گاز ءۇشىن اقشا تولەمەۋدىڭ جولىن تاپقان. وزىنە جانە اينالاسىنداعىلارعا ءقاۋىپ تونگەنىنە قاراماستان، ول ءۇيىنىڭ تۇسىنان ءوتىپ تۇرعان گاز قۇبىرىن ەكى جەردەن تەسىپ، وعان تەمىر قۇبىر، رەزەڭكە شلانگ بەكىتىپ، "قازترانسگاز ايماققا" تيەسىلى گازدى زاڭسىز پايدالانا باستاعان.
ەڭ قىزىعى، ۇرىنى گاز شارۋاشىلىعىنىڭ ماماندارى ەكى رەت ۇستاپ، گازبەن جابدىقتاۋدان اجىراتقان. ءبىراق ازامات و. تاعى دا كورشى گاز قۇبىرىنا زاڭسىز قوسىلىپ، كوگىلدىر وتىندى ۇرلاپ جاعۋدى جالعاستىردى. ءبىر جىل ىشىندە وسىنداي جولمەن ۇرلانعان گاز كولەمى 400 مىڭ تەڭگەگە جۋىقتاعان
اقىر سوڭىندا، قىلمىستىق ءىس قوزعالىپ، ءىس سوتقا جەتتى. سوت ازامات و. قازاقستان رەسپۋبليكاسى قىلمىستىق كودەكسىنىڭ 188-بابىنىڭ 1-بولىگىندە كوزدەلگەن قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىدى جانە وعان ءبىر جىل مەرزىمگە باس بوستاندىعىنان ايىرۋ تۇرىندەگى جازا تاعايىندادى. بۇل رەتتە، سوت گاز تاراتۋشى مەكەمەنىڭ ازاماتتىق تالاپ-ارىزىن تولىق قاناعاتتاندىردى.
ايتا كەتۋ كەرەك، كوگىلدىر وتىندى ۇرلاۋ فاكتىسىنەن باسقا، تۇرمىستا گازدى پايدالانۋ ەرەجەلەرىن بۇزۋ ەڭ اۋىر زارداپتارعا اكەلۋى مۇمكىن. پايدالانۋ ەرەجەلەرىن، قاۋىپسىزدىك تەحنيكاسىن ساقتاماي رۇقساتسىز ويىپ قوسۋ گازدىڭ تارالۋىنا، باياۋ جينالعان جەردەگى كونسەنتراسيا ارتقان كەزدە جويقىن جارىلىسقا اكەلۋى مۇمكىن. ونىڭ سالدارى اۋىر، ءتىپتى ءورت بولىپ، ادام ولىمىنە سوقتىرۋى ابدەن مۇمكىن.
