Jerlesimiz AQSh-qa jetý úshin jeti memlekettiń shekarasyn kesip ótken, jeti myń shaqyrym jol júrgen, sonyń ishinde 500 shaqyrymyn jaiaý jalpylap ótýge májbúr bolǵan. Ortalyq Amerikanyń ný jynysty ormanynda (jýngli) túnep, tropikalyq jańbyrdyń astynda qalypty. Kosta-Rika, Nikaragýa, Gondýras, Gvatemala, Meksika, Panama sekildi elderdi basyp ótken qazaq aqyr sońy Amerikaǵa jetip jyǵylǵan.
"Saiahatymyzdy Kolýmbiiadan bastadyq. Ári qarai bizdi shytyrman oqiǵalar kútip turdy. Panamanyń Darien deitin tabiǵi qoryǵynda bandylarǵa talana jazdadyq. Bul parkty qaraqshylar torýyldaidy eken. Álemniń ár túkpirinen kelgen qapteserler men baýkeserler osy arada boi tasalaidy. Jergilikti politseiler bul araǵa tumsyq tyǵa bermeidi. Qoi tastardyń qalqasyna tyǵylyp, butanyń túbine jasyrynyp, bul aradan da aman-esen óttik.
Keiin Karib teńizin keship óttik. Teńiz kúzetiniń kózine túspeýge tyrystyq. Sóitip Kosta Rikaǵa jettik. Munda da ońyp turǵany shamaly. Migrant ekeniń túrińde tur, qashyp-pysyp júrgenińdi aitpai biledi, shiraq qimyldamasań, bilegińnen shap berip, tutqynǵa alýy múmkin. Keiin týǵan-týysyńydy bopsalap, aqsha talap etedi. Meksika, Kosta Rika sekildi elderde bul úirenshikti jaǵdai...", - deidi jerlesemiz.
Osynshama mehnatty bastan ótken gastarbaiter qazaq aqyry ańsaǵan armanyna qol jetkizip, Amerikaǵa tabany tiedi.
Shekarany zańsyz kesip ótkendikten Janat turaqty, alym-salyǵy rásimdelgen jumysqa ornalasa almaidy. Eki qolǵa bir kúrek izdegen jerlesimiz ár túrli jerde jaldanyp jumys isteidi, qansha tóleidi sony mise tutady.
"Qazaqstanǵa jýyr arada orala almaimyn", - deidi ol.
Elimizdegi joqshylyq pen tapshylyqtan sharshaǵan jerlesterimiz jaqsy ómir izdep osyndai táýekelge barýǵa májbúr.
