G-Park qurylys kompaniiasynyń klientteri Astanadaǵy Ishki ister ministrligi ǵimaraty aldyna jinaldy, – dep habarlaidy Dalanews.kz.
Kaztag.kz málimetinshe, G-Park qurylys kompaniiasynyń narazy klientteri ministrdiń qabyldaýyna kirý úshin IIM ǵimaratynyń aldyna jinalǵan. Olardyń aitýynsha, páterleriniń qurylysy keshiktirilgen, osylaisha salymshylar ótken qyrkúiekte shartty buzǵan, biraq aqshasyn qaitara almaǵan.
G-Park-tiń daýly máselesi búgin bastalǵan joq. Buǵan deiin DALA INSIDE máseleni jiti baqylap, birneshe ret kótergen bolatyn. Al jýyrda QR Premer-ministri Oljas Bektenov Úkimet otyrysynda «G-Park» qurylys kompaniiasynyń Astanada 7 turǵyn úidi ruqsat qujattarynsyz salyp jatqanyn málimdedi. Sonymen qatar, osy úilerge 3,5 myń otbasynyń qarjy salyp qoiǵanyn aitty.
Al DALA INSIDE málimetinshe, premer-ministr Oljas Bektenovtyń dál osy qurylys kompaniiasyn atap aitqany, Sátmaǵambetovtyń ár qadamyn ańdyp otyrǵan quqyq qorǵaý organdary úshin signal bolýy da múmkin. Odan bólek, Astana ákimi Jeńis Qasymbek te «Sátmaǵambetov máselesin» tezirek sheshýge nietti.
«Sátmaǵambetovtyń ózin jaýapqa tartýmen is bitpeiin dep tur. Eks depýtat kóp nárseni búldirgen. Is nasyrǵa shapsa, memleketke onyń nysandaryn óz qaraýyna alyp, qujattaryn rettep, kepildik mehanizmi aiasynda salyp bitirýge týra keledi. Sebebi 3,5 myń úlesker áleýmettik tolqýlar týǵyza alatyn kúshke ie», – dep jazylǵan arna málimetinde.
«Aqtóbe oblysynda 11 obekti boiynsha aldanǵan úleskerler 2 jyldan beri sottasyp keledi. Astanadaǵy «Arabi-2 – Granitnyi-2″ turǵyn úi kesheni 10 jyl buryn problemalyq nysan dep tanylǵan. 200-ge jýyq otbasy úilerin ala almai otyr. Qujattary durys emes kóptegen obektilerdiń qurylys jumystary sozylyp ketýi múmkin. Elordada G-Park kompaniiasy ruqsat qujattaryn almastan 7 turǵyn úi qurylysyn júrgizýde. Al oǵan 3,5 myńǵa jýyq otbasy óz qarajatyn salǵan. Atyraý oblysynda mundai obektiler sany – 39. Bul – birinshi kezekte, ákimdikterdiń tarapynan jiberilgen kemshilikterdiń saldary», – dedi Bektenov Úkimet otyrysynda.
Osynyń aldynda Astana politsiiasy Sátmaǵambetov quryltaishy sanalatyn «Nur-Sultan Finans» JShS úleskerleriniń aryzy boiynsha qylmystyq is qozǵaǵan bolatyn.
«Astana qalasy Esil aýdanynyń politsiia basqarmasy úleskerlerdiń ótinishi boiynsha QR QK 190-babynyń 2-bóligi (alaiaqtyq) boiynsha sotqa deiingi tergep-tekserý jumystaryn júrgizýde. Onyń negizinde istiń mán-jaiyn anyqtaý úshin tiisti sharalar qabyldanady. Qazirgi ýaqytta barlyq qajetti tergeý áreketteri júrgizilýde. Nátijesi boiynsha kináli tulǵalardyń is – áreketterine quqyqtyq baǵa berilip, atalmysh is boiynsha sheshim qabyldanatyn bolady», – dep jaýap bergen edi Ishki ister ministrligi.
