Qazaqstanda «Fridom Finans» AQ men «KazTAG» aqparat agenttigi arasyndaǵy qylmystyq is boiynsha tergeý jalǵasyp jatyr, dep habarlaidy dalanews.kz.
Kompaniianyń málimetinshe, 2025 jyly «KazTAG» «Fridom Finansqa» qarsy aqparattyq shabýyl uiymdastyryp, alaiaqtyq, qarjy piramidasyn qurý jáne klientterdiń qarajatyn shetelge shyǵarý týraly aiyptaýlar qamtylǵan kóptegen teris jariialanym taratqan.
Osyǵan bailanysty «Fridom Finans» kompaniiasynyń aryzy negizinde QR Qylmystyq kodeksiniń 274-baby («Kórineý jalǵan aqparat taratý») boiynsha qylmystyq is qozǵalyp, «KazTAG» agenttiginiń bas direktory Áset Mataev pen bas redaktory Ámir Qasenov kúdikti dep tanylǵan.
Jaqynda «Fridom Finans» resmi málimdeme jasap, kináni moiyndaý jáne shyndyqqa sáikes kelmeitin málimetterdi joqqa shyǵarý shartymen mediativtik kelisim arqyly daýdy retteýge daiyn ekenin bildirdi. Bul stsenariidiń qanshalyqty yqtimal ekeni jáne oqiǵanyń ári qarai qalai órbýi múmkin ekeni jóninde Almaty qalasynyń prokýratýrasynan pikir suraldy.
«Fridom Finans» kompaniiasynyń «KazTAG-pen» tatýlasýǵa daiyn ekeni týraly jariia málimdemesine qalai pikir bildiresiz?
«Isti beibit jolmen retteý múmkindigi týraly aitatyn bolsaq, Qazaqstan Respýblikasynyń qoldanystaǵy zańnamasy mediatsiia jáne taraptardy tatýlastyrý institýttaryn protsestiń kez kelgen satysynda qoldanýǵa múmkindik berip qana qoimai, ony qoldaidy. «Fridom Finans» ókilderi buǵan deiin de «KazTAG» redaktsiiasy kinásin jáne jalǵan aqparat taratqanyn moiyndaǵan jaǵdaida bitimgershilik kelisimge barýǵa daiyn ekenin jariia túrde málimdegen bolatyn. Endi taraptar ózara kelisimge kelýi tiis nemese másele sotta sheshiledi», – dedi Almaty qalasy prokýratýrasynyń aǵa prokýrory Móldir Qanysova.
Al eger «KazTAG» bitimgershilikke kelýden bas tartyp, mediativtik kelisim jasaspasa, onda ne kútýge bolady?
«Ózderińiz biletindei, zań aldynda bári teń: bank bolsyn, buqaralyq aqparat quraly bolsyn – ádil sot úshin aiyrmashylyq joq. Barlyq protsess «Zań jáne tártip» qaǵidaty negizinde, qatań túrde quqyqtyq alańda ótedi», – dep atap ótti ol.
Sizdiń oiyńyzsha, bul jaǵdaida zań kimniń jaǵynda?
«Men istiń mán-jaiyn túsindire almaimyn. Sot qyzmetine qandai da bir aralasýǵa jol berilmeidi. Alaida protsessýaldyq máselelerge kelsek, quqyq qoldaný tájiribesinde naqty algoritm bar. Is materialdarynyń sotqa joldanýy – sotqa deiingi tergeý barysynda, tergeý organdarynyń pikirinshe, jetkilikti dáleldeme bazasy jinalǵanyn bildiredi. Munda tiisti sot saraptamasy negizgi ról atqarady. Eger saraptama jariialanymdarda iskerlik bedelge nuqsan keltiretin kórineý jalǵan aqparat taratý belgileri bar ekenin rastamaǵanda, is sot qaraýyna deiin jetpes edi. Bul – qalyptasqan protsessýaldyq tájiribe», – dedi prokýratýra ókili.
«KazTAG» bas redaktory da jaqynda jariia málimdeme jasady. Oǵan qandai pikir bildiresiz?
«Sottalýshy Ámir Qasenov úiqamaqta otyr. Bul onyń tergeý organdaryn habardar etpei turǵylyqty jerinen shyǵýyna, áleýmettik jelilerde qandai da bir material jariialaýyna jáne sot belgilegen ózge de shekteýlerdi buzýyna bolmaidy degendi bildiredi. Osy talaptardyń kez kelgenin buzý bultartpaý sharasyn qatańdatýǵa negiz bolýy múmkin. Sondyqtan taraptardy ustamdylyq tanytýǵa jáne arandatýshylyq áreketterge jol bermeýge shaqyramyn. Óitkeni mundai áreketter sotqa qysym kórsetý retinde baǵalanýy múmkin, al bul qylmystyq jaýapkershilikke ákeletin is-áreket», – dedi ol.
Sóz sońynda Móldir Qanysova sot protsesi qoldanystaǵy zań talaptaryna tolyq sáikes ótetinin atap ótti. Onyń aitýynsha, ár tarapqa óz quqyqtaryn qorǵaý úshin teń múmkindik berilgen jáne bul máselege sońǵy núkteni sot qoiady.
