Қазақстанда «Фридом Финанс» АҚ мен «КазТАГ» ақпарат агенттігі арасындағы қылмыстық іс бойынша тергеу жалғасып жатыр, деп хабарлайды dalanews.kz.
Компанияның мәліметінше, 2025 жылы «КазТАГ» «Фридом Финансқа» қарсы ақпараттық шабуыл ұйымдастырып, алаяқтық, қаржы пирамидасын құру және клиенттердің қаражатын шетелге шығару туралы айыптаулар қамтылған көптеген теріс жарияланым таратқан.
Осыған байланысты «Фридом Финанс» компаниясының арызы негізінде ҚР Қылмыстық кодексінің 274-бабы («Көрінеу жалған ақпарат тарату») бойынша қылмыстық іс қозғалып, «КазТАГ» агенттігінің бас директоры Әсет Матаев пен бас редакторы Әмір Қасенов күдікті деп танылған.
Жақында «Фридом Финанс» ресми мәлімдеме жасап, кінәні мойындау және шындыққа сәйкес келмейтін мәліметтерді жоққа шығару шартымен медиативтік келісім арқылы дауды реттеуге дайын екенін білдірді. Бұл сценарийдің қаншалықты ықтимал екені және оқиғаның әрі қарай қалай өрбуі мүмкін екені жөнінде Алматы қаласының прокуратурасынан пікір сұралды.
«Фридом Финанс» компаниясының «КазТАГ-пен» татуласуға дайын екені туралы жария мәлімдемесіне қалай пікір білдіресіз?
«Істі бейбіт жолмен реттеу мүмкіндігі туралы айтатын болсақ, Қазақстан Республикасының қолданыстағы заңнамасы медиация және тараптарды татуластыру институттарын процестің кез келген сатысында қолдануға мүмкіндік беріп қана қоймай, оны қолдайды. «Фридом Финанс» өкілдері бұған дейін де «КазТАГ» редакциясы кінәсін және жалған ақпарат таратқанын мойындаған жағдайда бітімгершілік келісімге баруға дайын екенін жария түрде мәлімдеген болатын. Енді тараптар өзара келісімге келуі тиіс немесе мәселе сотта шешіледі», – деді Алматы қаласы прокуратурасының аға прокуроры Мөлдір Қанысова.
Ал егер «КазТАГ» бітімгершілікке келуден бас тартып, медиативтік келісім жасаспаса, онда не күтуге болады?
«Өздеріңіз білетіндей, заң алдында бәрі тең: банк болсын, бұқаралық ақпарат құралы болсын – әділ сот үшін айырмашылық жоқ. Барлық процесс «Заң және тәртіп» қағидаты негізінде, қатаң түрде құқықтық алаңда өтеді», – деп атап өтті ол.
Сіздің ойыңызша, бұл жағдайда заң кімнің жағында?
«Мен істің мән-жайын түсіндіре алмаймын. Сот қызметіне қандай да бір араласуға жол берілмейді. Алайда процессуалдық мәселелерге келсек, құқық қолдану тәжірибесінде нақты алгоритм бар. Іс материалдарының сотқа жолдануы – сотқа дейінгі тергеу барысында, тергеу органдарының пікірінше, жеткілікті дәлелдеме базасы жиналғанын білдіреді. Мұнда тиісті сот сараптамасы негізгі рөл атқарады. Егер сараптама жарияланымдарда іскерлік беделге нұқсан келтіретін көрінеу жалған ақпарат тарату белгілері бар екенін растамағанда, іс сот қарауына дейін жетпес еді. Бұл – қалыптасқан процессуалдық тәжірибе», – деді прокуратура өкілі.
«КазТАГ» бас редакторы да жақында жария мәлімдеме жасады. Оған қандай пікір білдіресіз?
«Сотталушы Әмір Қасенов үйқамақта отыр. Бұл оның тергеу органдарын хабардар етпей тұрғылықты жерінен шығуына, әлеуметтік желілерде қандай да бір материал жариялауына және сот белгілеген өзге де шектеулерді бұзуына болмайды дегенді білдіреді. Осы талаптардың кез келгенін бұзу бұлтартпау шарасын қатаңдатуға негіз болуы мүмкін. Сондықтан тараптарды ұстамдылық танытуға және арандатушылық әрекеттерге жол бермеуге шақырамын. Өйткені мұндай әрекеттер сотқа қысым көрсету ретінде бағалануы мүмкін, ал бұл қылмыстық жауапкершілікке әкелетін іс-әрекет», – деді ол.
Сөз соңында Мөлдір Қанысова сот процесі қолданыстағы заң талаптарына толық сәйкес өтетінін атап өтті. Оның айтуынша, әр тарапқа өз құқықтарын қорғау үшін тең мүмкіндік берілген және бұл мәселеге соңғы нүктені сот қояды.
