Saltanatty ashylýda sóz alǵan oblys basshysy A. Batalov álemdik deńgeıdegi úlken jeliniń Almaty oblysynan ashylýy jetisýlyqtar úshin qýanysh ekenin aıta kele:
– «Búgin, mine, oblys aýmaǵynda ashylǵan iri gıpermarket jobasy arqyly óńirge 6 mlrd. teńge ınvestısıa tartyldy. Munda 370 jańa jumys orny quryldy. Kóptegen jastar jumysqa ornalasty. Bıyldan bastap Elbasynyń bastamasymen «7.20.25» baǵdarlamasynyń negizinde turǵyn úı salý qarqyndy júrgiziletin bolady. Sol úılerdi turǵyzýda, árleýde paıdalanylatyn materıaldardyń barlyǵy osy sórelerden tabylatynyna senimdimin. Kompanıa jetekshileri qazirdiń ózinde otandyq 40 taýar óndirýshimen kelisimshart jasasyp úlgeripti. Soǵan sáıkes taýar baǵasy da qoljetimdi bolyp, zaýyttardan tikeleı osy saýda sóresi arqyly tutynýshyǵa jetkizilýi quptarlyq is. Biz óz tarapymyzdan bıznesti damytýǵa barynsha qoldaý kórsete beremiz jáne táýelsiz jas memleketimizdiń ekonomıkasyn birge kóteremiz, – dedi A. Batalov. Oblys basshysy sóziniń sońynda osy ıgi iske muryndyq bolǵan elshi myrzaǵa, kompanıa basshylyǵyna rızashylyǵyn bildirdi.
Fransıanyń Qazaqstandaǵy elshisi Fılıpp Martını de óz kezeginde bıyl Qazaqstan men Fransıa arasyndaǵy baılanystyń ornaǵanyna 10 tolǵanyn atap ótti. Osy mereıtoılyq jylda fransýzdyq tanymal saýda jelisi Qazaqstan aýmaǵynda alǵash Almaty óńirinde óris ashyp otyrǵanyn tilge tıek etti. Onyń aıtýynsha Leroy Merlin gıpermarketter jelisine 2023 jyly 100 jyldyq mereıtoıyn atap ótpekshi eken. Sol merzimge deıin Qazaqstanda osyndaı markaly saýda úıleriniń sany 3-ke jetkizýdi kózdep otyrǵanyn alǵa tartty.
Atap ótsek, LeroyMerlin gıpermarketteri búginge deıin álemniń 12 memleketinde jumys isteıdi, Qazaqstan sol tizimge on úshinshi bolyp enip otyr. Eýropa elderi, Brazılıa, Qytaı, Reseı memleketterimen qatar Orta Azıa elderi ishinde Qazaqstan birinshi bolyp óz jerinde fransýzdyq atalmysh saýda jelisine jol ashty.
Qurylys jáne árleý jumystaryna arnalǵan materıaldar saýdalaıtyn gıpermarkettiń aýmaǵy 10 500 m2. Munda taýardyń 30 myńnan astam túri satylymǵa shyǵarylady. Saýda úıiniń janynda tutynýshylarǵa qolaıly 700 avtokólikke arnalǵan avtoturaq jumys isteıdi.
Osy kúni gıpermarkettiń ashylýyna oraı kelýshiler úshin konsert, shoýlar uıymdastyrylyp, lotoreıa bıletteri oınatyldy.
Baljan Qaıratqyzy
