Forbes Kazakhstan elimizdegi eń yqpaldy 25 áieldiń jyl saiynǵy reitingin jariialady. Basylymnyń baǵalaýynsha, Qazaqstanda áielderdiń saiasattaǵy, qarjy salasyndaǵy jáne biznestegi yqpaly artyp kele jatqanymen, joǵary basqarýshylyq laýazymdarǵa kóterilý qarqyny áli de baiaý, dep habarlaidy dalanews.kz.
Reitingtiń alǵashqy tórttigi ózgergen joq
Biylǵy tizimde byltyrǵy kóshbasshylar óz oryndaryn saqtap qaldy. Reitingtiń alǵashqy tórt satysynda:
- Úmit Shaiahmetova
- Mádina Ábilqasymova
- Aida Balaeva
- Lázzat Ibragimova
Forbes olardyń yqpaly qarjy júiesi, memlekettik basqarý jáne iri institýttardy basqarýmen tikelei bailanysty ekenin atap ótti.
Reitingke jańa esimder qosyldy
Biylǵy reitingke bes áiel alǵash ret endi. Olardyń qatarynda:
- Densaýlyq saqtaý ministri Aqmaral Álnazarova;
- Oqý-aǵartý ministri Juldyz Súleimenova;
- prodiýser ári kásipker Baian Alagózova;
- kásipkerler Gaýhar Ábikaeva men Raýshan Jaqsybai.
Sonymen qatar, reitingke buryn engen Ásel Janasova qaita oraldy.
Áielder yqpalynyń negizgi salasy – biznes
Biyl reitingtegi eń kóp ókildik biznes salasyna tiesili boldy. Tizimge engenderdiń jeteýi kásipkerlik jáne korporativtik basqarý salasynda eńbek etedi. Sondai-aq reitingte memlekettik basqarý, qarjy sektory, kvazimemlekettik uiymdar, qaiyrymdylyq qorlary, ǵylym, quqyq qorǵaý jáne mádeniet salasynyń ókilderi bar.
Yqpal tájiribemen keledi
Forbes dereginshe, reitingke engen áielderdiń ortasha jasy – 52. Eń jas qatysýshy 39 jasta bolsa, eń úlkeni 69 jasta.
Basylym jańa esimderdiń tizimge bir sáttik tanymaldyqtyń arqasynda emes, uzaq jyldyq kásibi tájiribe, basqarýshylyq jaýapkershilik jáne belgili bir salaǵa naqty yqpal ete alý qabileti arqyly kiretinin atap ótti.
Reiting qalai jasaldy?
Forbes Kazakhstan reitingti jasaý kezinde eldiń ekonomikasy, saiasaty jáne azamattyq qoǵam salalaryndaǵy 170-ten astam tanymal áieldi qarastyrǵan. Aldyn ala irikteýden keiin 55 úmitker tańdalyp, olardy biznes, saiasat, qoǵamdyq sektor jáne media ókilderinen quralǵan táýelsiz sarapshylar baǵalaǵan.
Qorytyndy nátijeniń:
- 90%-y – sarapshylar baǵasy;
- 5%-y – kapital kólemi, basqarýdaǵy aktivter, biznes aýqymy men jobalar kórsetkishteri;
- 5%-y – BAQ-taǵy tanymaldyq deńgeii negizinde eseptelgen.
Forbes bul reitingtiń resmi qujat emes, redaktsiianyń saraptamalyq jáne jýrnalistik baǵalaýy ekenin atap ótti.
