Forbes Kazakhstan еліміздегі ең ықпалды 25 әйелдің жыл сайынғы рейтингін жариялады. Басылымның бағалауынша, Қазақстанда әйелдердің саясаттағы, қаржы саласындағы және бизнестегі ықпалы артып келе жатқанымен, жоғары басқарушылық лауазымдарға көтерілу қарқыны әлі де баяу, деп хабарлайды dalanews.kz.
Рейтингтің алғашқы төрттігі өзгерген жоқ
Биылғы тізімде былтырғы көшбасшылар өз орындарын сақтап қалды. Рейтингтің алғашқы төрт сатысында:
- Үміт Шаяхметова
- Мәдина Әбілқасымова
- Аида Балаева
- Ләззат Ибрагимова
Forbes олардың ықпалы қаржы жүйесі, мемлекеттік басқару және ірі институттарды басқарумен тікелей байланысты екенін атап өтті.
Рейтингке жаңа есімдер қосылды
Биылғы рейтингке бес әйел алғаш рет енді. Олардың қатарында:
- Денсаулық сақтау министрі Ақмарал Әлназарова;
- Оқу-ағарту министрі Жұлдыз Сүлейменова;
- продюсер әрі кәсіпкер Баян Алагөзова;
- кәсіпкерлер Гауһар Әбікаева мен Раушан Жақсыбай.
Сонымен қатар, рейтингке бұрын енген Әсел Жанасова қайта оралды.
Әйелдер ықпалының негізгі саласы – бизнес
Биыл рейтингтегі ең көп өкілдік бизнес саласына тиесілі болды. Тізімге енгендердің жетеуі кәсіпкерлік және корпоративтік басқару саласында еңбек етеді. Сондай-ақ рейтингте мемлекеттік басқару, қаржы секторы, квазимемлекеттік ұйымдар, қайырымдылық қорлары, ғылым, құқық қорғау және мәдениет саласының өкілдері бар.
Ықпал тәжірибемен келеді
Forbes дерегінше, рейтингке енген әйелдердің орташа жасы – 52. Ең жас қатысушы 39 жаста болса, ең үлкені 69 жаста.
Басылым жаңа есімдердің тізімге бір сәттік танымалдықтың арқасында емес, ұзақ жылдық кәсіби тәжірибе, басқарушылық жауапкершілік және белгілі бір салаға нақты ықпал ете алу қабілеті арқылы кіретінін атап өтті.
Рейтинг қалай жасалды?
Forbes Kazakhstan рейтингті жасау кезінде елдің экономикасы, саясаты және азаматтық қоғам салаларындағы 170-тен астам танымал әйелді қарастырған. Алдын ала іріктеуден кейін 55 үміткер таңдалып, оларды бизнес, саясат, қоғамдық сектор және медиа өкілдерінен құралған тәуелсіз сарапшылар бағалаған.
Қорытынды нәтиженің:
- 90%-ы – сарапшылар бағасы;
- 5%-ы – капитал көлемі, басқарудағы активтер, бизнес ауқымы мен жобалар көрсеткіштері;
- 5%-ы – БАҚ-тағы танымалдық деңгейі негізінде есептелген.
Forbes бұл рейтингтің ресми құжат емес, редакцияның сараптамалық және журналистік бағалауы екенін атап өтті.
