FlyArystan jolaýshysy Almatydan Aqtaýǵa ushatyn reiske otyrǵyzylmaǵanyn aityp, áýe kompaniiasyna shaǵymdandy, dep habarlaidy dalanews.kz.
Jolaýshy Viacheslavtyń aitýynsha, oǵan áýejaidaǵy FlyArystan qyzmetkeri «Sizdi reiske otyrǵyzbaimyn» dep aitqan. Er adamnyń sózinshe, oǵan reiske otyrýǵa ruqsat berilmeýine qol júginiń eki bólikke bólinýi sebep bolǵan. Onyń qolynda paket pen riýkzak bolǵan.
Jolaýshynyń aitýynsha, eki zattyń jalpy salmaǵy belgilengen talaptarǵa sáikes kelgen. Ol máseleni qyzmetkerlerden naqtylaýǵa tyrysqanymen, oǵan ne isteý kerektigi jóninde jaýap berilmegen. Keiin basqa jolaýshylar zattaryn bir júkke biriktirýdi usynǵan.
Viacheslavtyń aitýynsha, ol áý bastan basqa jolaýshylarmen birge geit mańynda bolǵan. Alaida sońynda reiske jolaýshylardyń barlyǵy kirgizilip, tek ózi ǵana ushaqqa otyrǵyzylmaǵan. Er adam tártip buzbaǵanyn jáne qyzmetkerlermen dóreki sóilespegenin atap ótti.
Osydan keiin jolaýshy jańa bilet satyp alyp, Aqtaýǵa Astana arqyly ushýǵa májbúr bolǵan. Onyń aitýynsha, FlyArystan kompaniiasyna jazǵan ótinishine bes kún ótse de jaýap berilmegen.
Aviakompaniianyń qol júgine qatysty erejesine sáikes, jolaýshy bortqa salmaǵy 7 kelige deiingi jáne ólshemi 56×23×36 santimetrden aspaityn bir ǵana qol júgin tegin alyp kire alady. Iaǵni birneshe zattyń jalpy salmaǵy belgilengen mólsherden aspaǵanymen, olar bir júk retinde rásimdelýi kerek.
Sondai-aq osy reiske taǵy bir erli-zaiyptynyń da otyrǵyzylmaǵany aityldy. Aldyn ala málimet boiynsha, olar otyrǵyzýdyń aiaqtalǵany týraly habarlandyrýdy estimegen bolýy múmkin.
Oqiǵa týraly aqparatty Qumash jariialady. Qazirgi ýaqytta jolaýshynyń málimdemesi boiynsha ǵana belgili bolyp otyr, al FlyArystan tarapynan jaǵdaiǵa qatysty resmi túsinikteme berilgen joq.
