Belgili sport jýrnalisi Aslan Qajenov qyzmetinen qýylǵan, bokstan ulttyq quramanyń bas bapkeri bolǵan Myrzaǵali Aitjanovqa ara tústi,- dep habarlaidy Dalanews.kz.
Keshe bokstan Qazaqstan erler quramasynyń bas jattyqtyrýshysy Myrzaǵali Aitjanov pen ózge de mamandar qyzmetinen bosatyldy. Parij Olimpiadasyndaǵy sátsizdikterden keiin qoǵam Nurbek Oralbaidyń kúmisine riza bolsa da, qynjylysyn ashyq bildirdi. Kópshilik bul jaittyń sebebin "Myrzaǵali Aitjanovtyń sózi ótpeitin bolǵan, jattyqtyrýshylar bir bólek, boksshylar bir bólek erkelep ketken" dep topshylady. Keibireýler Parij Olimpiadasynan keiin ulttyq quramada úlken kadrlyq ózgeris bolatynyn da sezdi.
Sport jýrnalisi bokstan shettetilgen jattyqtyrýshylardy "paidalanyp laqtyra saldyq" dep synady.
"Pailadanyp-paidalanyp, laqtyra saldyq... Kesheden beri ishim qainap, óz-ózime kele almai júrmin. 10 birdei bapkerdi dalaǵa laqtyra saldyq. Týra maǵynasynda solai. Parij olimpiadasynan keiin bir qorytyndy jiyn bolmady. Bir saraptama jasalmady. Taraptardyń ýájin de tyńdamadyq. Bizden de kinárát bar. «Myrzaǵali ketsin», «Myrzaǵali kináli», «Myrzaǵali qurtty» - dep shýlai kettik. Bylai aitqanda «qan» kerek boldy. Federatsiia aldy da Myrzaǵali Aitjanovty qurbandyqqa shaldy. Al, endi ne isteimiz? Ary qarai qandai jospar? Tyǵyryqtan qalai shyǵamyz? Eshkim jaýap bere almaidy. Keshe birneshe podkastqa qatysyp, osyny aityp úlgergenim sol edi, telefonyma qarasam jańaǵy sheshim shyǵyp qoiǵan. Al, osyǵan qanaǵatpyz ba? Osymen búkil másele retteldi me? Rasymen de, tek qana Myrzaǵali Aitjanov bastaǵan bapkerler komandany artqa taryp, qazaq boksyn qurdym jiberdi me? Basqa eshqandai faktor joq pa? Basqa eshkim kináli emes pe? Endeshe, jaraidy. Myqty ekenbiz. Óte «parasatty» sheshim. Óte «keremet» túiin", - dedi ol.
Aslan Qajenov boksshylardy jumystan qýmas buryn bul másele jan-jaqty talqylanýy kerek edi degen pikirde. Sonymen qatar, Boks federatsiiasyna buǵan deiin talai chempiondy tárbielep shyǵarǵan Tursynǵali Edilov qyzmetke keldi. Ol Qazaqstan boks federatsiiasy prezidentiniń keńesshisi qyzmetine taǵaiyndaldy.
"Negizi kez-kelgen ýaqytta jumystan shyǵara salýǵa bolady. Oǵan jabysyp otyrǵan Myrza aǵa da joq. Birinshi naqty strategiia qurmaimyz ba? Ok. Bir myqtyny alyp tastadyq. Ekinshi myqtyny ornyna qoiamyz. Endi qos myqty bir-birine qarsy jumys isteidi. Biz odan da sol myqtylardyń basyn nege bir jerge qospaimyz? Buǵan deiin de osyndai múddeler toǵysynyń kesirinen, adamdardy bir-birine qarsy qoiý saldarynan talai taiaq jedik. Áli de sabaq alar túrimiz joq. Qoshtasqannyń ózinde búginge deiin jasaǵan eńbegin elep-eskerip, arqasyna shapan jaýyp, diplomatiialyq jolmen, iaki, qazaqy izetpen jasaýǵa bolmas pa edi. Syrtynan buiryq shyǵaryp, instagram arqyly alyp tastaimyz. Ony ol úiinde jatyp biledi. Ne degen qurmet? Ne degen qatynas? Budan keiin bizdi kim syilaidy? Kim qurmetteidi? Kerisinshe, kórshi elderge kúlki bolyp jatyrmyz", - dep ashyndy ol.
Sport jýrnalisi "qazaq boksy Myrzaǵali Aitjanov áli qajet etetinin aityp", oǵan qoldaý kórsetti.
"Myrza aǵaǵa, amandyq tileimin. Búginge deiin jasaǵan eńbegińizge rahmet. Shákirtterińiz bergen nátijege rahmet. Ulttyq quramamen jetken jetistikterińizge rahmet. Álemniń kez-kelgen elinde abyroiyńyz bar. Kez-kelgen ortada mysyńyz basyp turady. Qazaqtyń bapkeri, qazaqtyń mamany retinde tanidy. Sol úshin qurmeteidi. Al, ulttyq komanda ishindegi rólińiz, tipten, bólek áńgime. Sonyń barlyǵyna alǵys aitamyn. Júrekke qatty qabyldamańyz. Kóp ýaqyt ótpedi. Qazaq boksy qaitadan Myrzaǵaliin izdeidi. Sol kezde Myrzaliden artyq adam da bolmaidy. Men oǵan senimdimin. Soǵan deiin joǵalmańyz. Bilem, boks súiikti isińiz. Tipti, ómirińiz. Sondyqtan, odan ajyramańyz. Biz osyndai qatigezbiz. Biz osyndai emotsiiaǵa berilgishpiz. Qazir siz qyzmette joqsyz. Sizben birge bolǵandar ashyq qoldai almaidy. Tipti, osy posqa laik ta basa almaýy múmkin. Dese de, aitpaǵym, búkil qazaq sizden teris ainalǵan joq..." - dedi ol.
Aita keteiik, buǵan deiin Olimpiadadaǵy jaǵdaiǵa qatysty Aitjanovty synaǵandardyń qatarynda Beijiń Olimpiadasynyń chempiony Baqyt Sársekbaev ta bolǵan edi.
"Qazir boks tizginin alýǵa kim kelse de, ol kisige ońai bolmasy anyq. Myrzekeń svetin óshirip, esigin jaýyp ketken boksty qaita jandandyrýǵa óte kóp kúsh qajet. Jańa komanda jasaqtap, eski qaldyqtardan qutylý da ońai emes. Ne de bolsa qajymas qairat, úlken sáttilik tileiik jańa basshyǵa!" - dedi ol.
