بەلگىلى سپورت ءجۋرناليسى اسلان قاجەنوۆ قىزمەتىنەن قۋىلعان، بوكستان ۇلتتىق قۇرامانىڭ باس باپكەرى بولعان مىرزاعالي ايتجانوۆقا ارا ءتۇستى،- دەپ حابارلايدى Dalanews.kz.
كەشە بوكستان قازاقستان ەرلەر قۇراماسىنىڭ باس جاتتىقتىرۋشىسى مىرزاعالي ايتجانوۆ پەن وزگە دە ماماندار قىزمەتىنەن بوساتىلدى. پاريج وليمپياداسىنداعى ساتسىزدىكتەردەن كەيىن قوعام نۇربەك ورالبايدىڭ كۇمىسىنە ريزا بولسا دا، قىنجىلىسىن اشىق ءبىلدىردى. كوپشىلىك بۇل جايتتىڭ سەبەبىن "مىرزاعالي ايتجانوۆتىڭ ءسوزى وتپەيتىن بولعان، جاتتىقتىرۋشىلار ءبىر بولەك، بوكسشىلار ءبىر بولەك ەركەلەپ كەتكەن" دەپ توپشىلادى. كەيبىرەۋلەر پاريج وليمپياداسىنان كەيىن ۇلتتىق قۇرامادا ۇلكەن كادرلىق وزگەرىس بولاتىنىن دا سەزدى.
سپورت ءجۋرناليسى بوكستان شەتتەتىلگەن جاتتىقتىرۋشىلاردى "پايدالانىپ لاقتىرا سالدىق" دەپ سىنادى.
"پايلادانىپ-پايدالانىپ، لاقتىرا سالدىق... كەشەدەن بەرى ءىشىم قايناپ، وز-وزىمە كەلە الماي ءجۇرمىن. 10 بىردەي باپكەردى دالاعا لاقتىرا سالدىق. تۋرا ماعىناسىندا سولاي. پاريج وليمپياداسىنان كەيىن ءبىر قورىتىندى جيىن بولمادى. ءبىر ساراپتاما جاسالمادى. تاراپتاردىڭ ءۋاجىن دە تىڭدامادىق. بىزدەن دە كىنارات بار. «مىرزاعالي كەتسىن»، «مىرزاعالي كىنالى»، «مىرزاعالي قۇرتتى» - دەپ شۋلاي كەتتىك. بىلاي ايتقاندا «قان» كەرەك بولدى. فەدەراسيا الدى دا مىرزاعالي ايتجانوۆتى قۇرباندىققا شالدى. ال، ەندى نە ىستەيمىز؟ ارى قاراي قانداي جوسپار؟ تىعىرىقتان قالاي شىعامىز؟ ەشكىم جاۋاپ بەرە المايدى. كەشە بىرنەشە پودكاستقا قاتىسىپ، وسىنى ايتىپ ۇلگەرگەنىم سول ەدى، تەلەفونىما قاراسام جاڭاعى شەشىم شىعىپ قويعان. ال، وسىعان قاناعاتپىز با؟ وسىمەن بۇكىل ماسەلە رەتتەلدى مە؟ راسىمەن دە، تەك قانا مىرزاعالي ايتجانوۆ باستاعان باپكەرلەر كوماندانى ارتقا تارىپ، قازاق بوكسىن قۇردىم جىبەردى مە؟ باسقا ەشقانداي فاكتور جوق پا؟ باسقا ەشكىم كىنالى ەمەس پە؟ ەندەشە، جارايدى. مىقتى ەكەنبىز. وتە «پاراساتتى» شەشىم. وتە «كەرەمەت» ءتۇيىن"، - دەدى ول.
اسلان قاجەنوۆ بوكسشىلاردى جۇمىستان قۋماس بۇرىن بۇل ماسەلە جان-جاقتى تالقىلانۋى كەرەك ەدى دەگەن پىكىردە. سونىمەن قاتار، بوكس فەدەراسياسىنا بۇعان دەيىن تالاي چەمپيوندى تاربيەلەپ شىعارعان تۇرسىنعالي ەدىلوۆ قىزمەتكە كەلدى. ول قازاقستان بوكس فەدەراسياسى پرەزيدەنتىنىڭ كەڭەسشىسى قىزمەتىنە تاعايىندالدى.
"نەگىزى كەز-كەلگەن ۋاقىتتا جۇمىستان شىعارا سالۋعا بولادى. وعان جابىسىپ وتىرعان مىرزا اعا دا جوق. ءبىرىنشى ناقتى ستراتەگيا قۇرمايمىز با؟ وك. ءبىر مىقتىنى الىپ تاستادىق. ەكىنشى مىقتىنى ورنىنا قويامىز. ەندى قوس مىقتى بىر-بىرىنە قارسى جۇمىس ىستەيدى. ءبىز ودان دا سول مىقتىلاردىڭ باسىن نەگە ءبىر جەرگە قوسپايمىز؟ بۇعان دەيىن دە وسىنداي مۇددەلەر توعىسىنىڭ كەسىرىنەن، ادامداردى بىر-بىرىنە قارسى قويۋ سالدارىنان تالاي تاياق جەدىك. ءالى دە ساباق الار ءتۇرىمىز جوق. قوشتاسقاننىڭ وزىندە بۇگىنگە دەيىن جاساعان ەڭبەگىن ەلەپ-ەسكەرىپ، ارقاسىنا شاپان جاۋىپ، ديپلوماتيالىق جولمەن، ياكي، قازاقى ىزەتپەن جاساۋعا بولماس پا ەدى. سىرتىنان بۇيرىق شىعارىپ، ينستاگرام ارقىلى الىپ تاستايمىز. ونى ول ۇيىندە جاتىپ بىلەدى. نە دەگەن قۇرمەت؟ نە دەگەن قاتىناس؟ بۇدان كەيىن ءبىزدى كىم سىيلايدى؟ كىم قۇرمەتتەيدى؟ كەرىسىنشە، كورشى ەلدەرگە كۇلكى بولىپ جاتىرمىز"، - دەپ اشىندى ول.
سپورت ءجۋرناليسى "قازاق بوكسى مىرزاعالي ايتجانوۆ ءالى قاجەت ەتەتىنىن ايتىپ"، وعان قولداۋ كورسەتتى.
"مىرزا اعاعا، اماندىق تىلەيمىن. بۇگىنگە دەيىن جاساعان ەڭبەگىڭىزگە راحمەت. شاكىرتتەرىڭىز بەرگەن ناتيجەگە راحمەت. ۇلتتىق قۇرامامەن جەتكەن جەتىستىكتەرىڭىزگە راحمەت. الەمنىڭ كەز-كەلگەن ەلىندە ابىرويىڭىز بار. كەز-كەلگەن ورتادا مىسىڭىز باسىپ تۇرادى. قازاقتىڭ باپكەرى، قازاقتىڭ مامانى رەتىندە تانيدى. سول ءۇشىن قۇرمەتەيدى. ال، ۇلتتىق كوماندا ىشىندەگى ءرولىڭىز، تىپتەن، بولەك اڭگىمە. سونىڭ بارلىعىنا العىس ايتامىن. جۇرەككە قاتتى قابىلداماڭىز. كوپ ۋاقىت وتپەدى. قازاق بوكسى قايتادان ءمىرزاعاليىن ىزدەيدى. سول كەزدە مىرزاليدەن ارتىق ادام دا بولمايدى. مەن وعان سەنىمدىمىن. سوعان دەيىن جوعالماڭىز. بىلەم، بوكس سۇيىكتى ءىسىڭىز. ءتىپتى، ءومىرىڭىز. سوندىقتان، ودان اجىراماڭىز. ءبىز وسىنداي قاتىگەزبىز. ءبىز وسىنداي ەموسياعا بەرىلگىشپىز. ءقازىر ءسىز قىزمەتتە جوقسىز. سىزبەن بىرگە بولعاندار اشىق قولداي المايدى. ءتىپتى، وسى پوسقا لايك تا باسا الماۋى مۇمكىن. دەسە دە، ايتپاعىم، بۇكىل قازاق سىزدەن تەرىس اينالعان جوق..." - دەدى ول.
ايتا كەتەيىك، بۇعان دەيىن وليمپياداداعى جاعدايعا قاتىستى ايتجانوۆتى سىناعانداردىڭ قاتارىندا بەيجىڭ وليمپياداسىنىڭ چەمپيونى باقىت سارسەكبايەۆ تا بولعان ەدى.
"ءقازىر بوكس تىزگىنىن الۋعا كىم كەلسە دە، ول كىسىگە وڭاي بولماسى انىق. مىرزەكەڭ سۆەتىن ءوشىرىپ، ەسىگىن جاۋىپ كەتكەن بوكستى قايتا جانداندىرۋعا وتە كوپ كۇش قاجەت. جاڭا كوماندا جاساقتاپ، ەسكى قالدىقتاردان قۇتىلۋ دا وڭاي ەمەس. نە دە بولسا قاجىماس قايرات، ۇلكەن ساتتىلىك تىلەيىك جاڭا باسشىعا!" - دەدى ول.
