Dál osydan bes jyl buryn elimizde EXPO-2017 sharasy dúrkirep ótken edi. Sol kezde halyqaralyq kórmeni uıymdastyrýshalar atalmysh shara úshin salynǵan ǵımarattardy jalǵa berip, ketken shyǵyndy eselep qaıtatynyn aıtqanyn da umyta qoıǵan joqpyz.

Biraq EXPO kórmesi úshin salynǵan ǵımarattardan anaý aıtqanda qarjy túsip jatqan joq. Qaıta EXPO ǵımarattary búdjetke salmaq túsirýde.

Aıtalyq, 2018-2022 jyldar aralǵynda kózdiń jaýyn alatyn ǵımarattarǵa ıelik etetin QazExpoCongress kompanıasy memleket búdjetinen 80,4 mlrd teńge alǵan. Ótken jyldyń ózinde abajadaı ǵımarattardy kútip, baptaý úshin qazynadan 18,3 mlrd teńge jumsalypty.

Arada 5 jyl ótse de halyq EXPO-nyń paıdasyn kórgen joq. QazExpoCongress kompanıasy 2024 jyly ǵana búdjetten qarjy almaı óz kúnin ózi kórip ketedi degen boljam bar. Oǵan deıin EXPO ǵımarattary búdjetke masyl bolaıyn dep tur.