QR Mádeniet jáne aqparat ministrligi 2024 jylǵa qorytyndy shyǵarýdy jalǵastyrýda. Bul joly nazarlaryńyzǵa aqparat salasyndaǵy mańyzdy oqiǵalardy usynamyz.
Qazaqstannyń ǵana emes, búkil Ortalyq Aziia aimaǵynyń media keńistigindegi aitýly oqiǵalardyń biri – Astanada Euronews keńsesiniń ashylýy. Bul komanda halyqaralyq aýditoriiaǵa Qazaqstannyń mádenieti, ekonomikasy jáne murasymen tanystyratyn bolady. Keńse mádenietter arasyndaǵy dialog alańy jáne jańa ideialar men kreativti sheshimderdi nasihattaý ortalyǵy retinde mańyzdy ról atqarady.
Qazirgi ýaqytta 20 jobany iske asyrý boiynsha jumys júrgizilip jatyr. Olardyń qatarynda mádeniet, óner men ómir salty týraly «Modern Nomads» shoýy, biznes pen ekonomikaǵa arnalǵan óńirlik shoý – «East-West Connect», sondai-aq óńirlik tulǵalarmen suhbattar – «Voices from Central Asia» jobalary bar.
Yntymaqtastyqtyń mańyzdy bóligi – Euronews academy jobasyn júzege asyrý. Onyń aiasynda otandyq jýrnalisterge sheteldik spikerlerdiń qatysýymen oflain treningter men master-klasstar uiymdastyrylatyn bolady. Bul qazaqstandyq BAQ ókilderiniń kásibiligine oń áserin tigizeri anyq.
Biyl Qazaqstanda «Mass-media týraly» Zań qabyldandy. Jańa Zańǵa sáikes, BAQ materialdaryna talap qoiý merzimi – 1 jyl, BAQ suraýlaryn qaraý merzimi – 5 kún, granttyq qarjylandyrý, memlekettik tildiń BAQ-taǵy úlesi – 60% dep belgilendi. Sonymen qatar, jýrnalisterdi akkreditatsiialaýdyń Úlgilik qaǵidalary bekitildi.
Halyq pen media salasy mamandarynyń mediasaýattylyǵyn arttyrý – ministrlik qyzmetiniń basym baǵyttarynyń biri. Ministrlik salanyń kadrlyq áleýetiniń kásibi deńgeiin arttyrý boiynsha júieli jumys júrgizýde.
Jyl saiyn meditsina, ekologiia, din, qarjy-ekonomika, quqyq, áskeri is, ultaralyq qatynastar, aýyl sharýashylyǵy, tsifrlandyrý, munai-gaz salalarynda jýrnalister men media mamandyǵy stýdentteri oqytý kýrstarynan ótedi.
Biyl salalyq jýrnalisterdi daiarlaý maqsatynda elimizdiń jetekshi joǵary oqý oryndarymen 4 memorandýmǵa qol qoiyldy.
Qyrkúiekte elordada «Astana Media Week 2024» media jáne tsifrlyq kommýnikatsiialar salasyndaǵy jyl saiynǵy is-shara tabysty ótti. Biylǵy sharada quqyqtyq transformatsiia, kópplatformaly ekojúielerdi damytý, óńirlik, sporttyq jáne salalyq jýrnalistika, balalar kontenti, sondai-aq áleýmettik shielenisti basqarýdaǵy ahýaldyq ortalyqtardyń róline erekshe nazar aýdaryldy.
Sapaly qazaqstandyq televidenieni ilgeriletý men damytýǵa baǵyttalǵan «Tumar» ulttyq televiziialyq syilyǵy segizinshi jyl qatarynan ótkizilip keledi. Biyl «Tótenshe jaǵdailardaǵy úzdik reportaj» degen jańa nominatsiia qosyldy. Sondai-aq 2017 jyldan bastap baspa, radio jáne internet jýrnalistika salasyndaǵy jetistikteri úshin beriletin «ÚRKER» ulttyq syilyǵy ótkizilip keledi.
QR Mádeniet jáne aqparat ministrliginiń baspasóz qyzmeti
