«Eýrazıa álemi» pikirsaıys klýbynda osy joly «Kıno jáne adamdar: úlken ekran kórermendi biriktiredi» degen taqyryp talqylandy. Jıynda bas qosqan sarapshylar atalǵan taqyrypqa oraı óz pikirlerin bildirdi.
«Eýrazıalyq odaq keńistigindegi fılm týraly aıtar bolsam, ol ázirgi kúni barlyq kınoteatrlardan kórsetile bastaǵan «28 panfılovshy» fılmi. Bul týyndy týraly 2009 jyly beri aıtyp júrdi. Aqyry, jobany túsirýge aqsha jınaldy. Bul buqaranyń kómegimen túsirilgen alǵashqy halyqtyq fılm» dedi óz sózinde sharanyń shymyldyǵyn túrgen saıasattanýshy Edýard Poletaev.
Qazaqfılm kınostýdıasynyń PR-dırektory Dmıtrıı Shıshkınniń aıtýynsha fılmniń búdjeti 150 mln. rýbldi quraǵan. Qalyń buqara óz qaltasynan 35 mln. rúbl jınap beripti. Ol atap ótkendeı fılmge tanymal akterler túsken.
«Alaıda olardyń eshbiri budan tabys tabýdy kózdegen joq, kerisinshe týyndyǵa tarıhı týyndy retinde qarady» deıdi ol.
Óz kezeginde Qazaqstannyń kınosynshylar qaýymdastyǵynyń prezıdenti Gúlnár Ábikeeva elimizde kınoónimnen tabys tabý áli jolǵa qoıylmaǵanyn tilge tıek etti.
«Bizdiń Qytaı men Reseı syndy alyp memlekettermen áriptestik baılanysta ekenimizdi eskersek bolashaqta Uly Jibek joly týraly fılm túsirilýi múmkin. Budan basqa da taqyryptar paıda bolýy ǵajap emes» dedi ol.
Onyń aıtýynsha sońǵy kezderi Qazaqstannyń kınonaryǵyna qyzyǵýshylyq tanytqan kórshi elderdiń sany ósip keledi. Bıylǵy jyldyń ózinde otandyq kınoteatrlar qyrǵyz, orys, ózbek jáne mońǵol fılmderin kórsetken.
Al saıasattanýshy Andreı Chebotarevtiń aıtýynsha sońǵy 25 jylda bir kezdegi KSRO quramynda bolǵan elderdiń biriktiretin birde-bir týyndy túsirilmegen.
«Osynyń kesirinen biz bir kezdegi baýyrlas elderdiń kınolaryn kóre almaıtyn boldyq.Aıtalyq, grýzın, armán nemese moldovan baýyrlarymyzdyń týyndylaryn nege tamashalamaımyz?» dedi ol óz sózinde.
Otyrysty túıindegen kınoprodúser Sáken Belgibaevtyń aıtýynsha sońǵy jyldary otandyq kıno shyn táýelsizdikke ıe boldy.
«Otandyq kınonyń kórermenderi negizinen aımaqtarda. Bir kezderi Astana men Almatydan tys óńirlerde bar bolǵany 11 kınoteatr bolǵan. Al qazir olardyń sany 300-den asyp jyǵylady» dedi ol.
