Eski Qazaqstannyń jarqyn ókilderi, sonyń ishinde bilikten uzaq jyl kete almai júrgen Shyǵys Qazaqstan oblysynyń eks-ákimi Danial Ahmetov pen burynǵy Úkimet basshysy Asqar Mamin sport salasyndaǵy laýazymdy qyzmetterge usynyla bastady, - dep habarlaidy Dalanews.kz.
Keshe Ulttyq olimpiada komitetiniń Táýelsiz sailaý komissiiasynyń otyrysy ótken. Al otyrystyń tiisti qujaty Tengri Sport redaktsiiasyna túsken. Basty jańalyq Timýr Qulybaevtyń ornyna álemge aty shyqqan boksshy Gennadii Golovkinniń kandidatýrasy usynylýynan bólek, qujattan taǵy da biraz esimdi baiqaýǵa bolady.
"Ulttyq olimpiada komitetiniń qysqy sport túrleri jóninen vitse-prezidenti qyzmetine burynǵy premer-ministr Asqar Maminniń kandidatýrasy usynyldy", - dep jazylǵan qujatta.
Buǵan deiin Maminniń Túrkiia elinde alańsyz júrgen videosy áleýmettik jelide jylt etken edi. Al oǵan deiin fýtbol federatsiiasynyń eks-prezidenti Ádilbek Jaqsybekov pen Asqar Mamin Ystambulda ótken Chempiondar ligasynda júrgen jerinen kózge tústi. Eks-shendi Mamin 2022 jyly laýazymynan túsip qaldy. Onyń ornyna Úkimetti basqarýǵa Álihan Smaiylov kelgen bolatyn.
Al olimpiadalyq sport túrleri boiynsha ulttyq federatsiianyń ókili laýazymyna usynylǵandar ishinde Danial Ahmetovtiń esimin baiqaýǵa bolady.
Ahmetov jýyrda ǵana Astanada jeńil atletikadan Ámin Tuiaqov júldesine arnalǵan Astana Indoor Meet halyqaralyq týrniri aiasynda kózge túsip qalǵan edi. Derekterge súiensek, beldi sheneýnik qazir jeńil atletika federatsiiasynyń prezidenti bolyp otyr. Shyǵys Qazaqstandy tapjylmai 9 jyl basqarǵan eks-ákim osylai sportty tizgindeýge oiysypty.
Buǵan deiin de qoǵamda Ulttyq olimpiada komitetiniń basshylyq quramyna qatysty qyzý daý júrip jatyr. Depýtattar da bul máseleni birneshe márte kóterdi. Máselen, Bapi Qulybaevty ashyq synap tastap edi.
"Onyń oiy eldiń munaiyn satyp, qaltasyn toltyrý. Sportty qaitsyn?! ...Parij Olimpiadasy qarsańynda mundai jaǵdaiǵa múldem jol berilmeýi tiis! Ulttyq Olimpiada Komitetine túbegeili ózgerister kerek", - degen edi ol.
