ەسكى قازاقستاننىڭ جارقىن وكىلدەرى، سونىڭ ىشىندە بيلىكتەن ۇزاق جىل كەتە الماي جۇرگەن شىعىس قازاقستان وبلىسىنىڭ ەكس-اكىمى دانيال احمەتوۆ پەن بۇرىنعى ۇكىمەت باسشىسى اسقار مامين سپورت سالاسىنداعى لاۋازىمدى قىزمەتتەرگە ۇسىنىلا باستادى، - دەپ حابارلايدى Dalanews.kz.
كەشە ۇلتتىق وليمپيادا كوميتەتىنىڭ تاۋەلسىز سايلاۋ كوميسسياسىنىڭ وتىرىسى وتكەن. ال وتىرىستىڭ ءتيىستى قۇجاتى Tengri Sport رەداكسياسىنا تۇسكەن. باستى جاڭالىق تيمۋر قۇلىبايەۆتىڭ ورنىنا الەمگە اتى شىققان بوكسشى گەنناديي گولوۆكيننىڭ كانديداتۋراسى ۇسىنىلۋىنان بولەك، قۇجاتتان تاعى دا ءبىراز ەسىمدى بايقاۋعا بولادى.
"ۇلتتىق وليمپيادا كوميتەتىنىڭ قىسقى سپورت تۇرلەرى جونىنەن ۆيسە-پرەزيدەنتى قىزمەتىنە بۇرىنعى پرەمەر-مينيستر اسقار ءماميننىڭ كانديداتۋراسى ۇسىنىلدى"، - دەپ جازىلعان قۇجاتتا.
بۇعان دەيىن ءماميننىڭ تۇركيا ەلىندە الاڭسىز جۇرگەن ۆيدەوسى الەۋمەتتىك جەلىدە جىلت ەتكەن ەدى. ال وعان دەيىن فۋتبول فەدەراسياسىنىڭ ەكس-پرەزيدەنتى ادىلبەك جاقسىبەكوۆ پەن اسقار مامين ىستامبۇلدا وتكەن چەمپيوندار ليگاسىندا جۇرگەن جەرىنەن كوزگە ءتۇستى. ەكس-شەندى مامين 2022 جىلى لاۋازىمىنان ءتۇسىپ قالدى. ونىڭ ورنىنا ۇكىمەتتى باسقارۋعا ءاليحان سمايىلوۆ كەلگەن بولاتىن.
ال وليمپيادالىق سپورت تۇرلەرى بويىنشا ۇلتتىق فەدەراسيانىڭ وكىلى لاۋازىمىنا ۇسىنىلعاندار ىشىندە دانيال احمەتوۆتىڭ ەسىمىن بايقاۋعا بولادى.
احمەتوۆ جۋىردا عانا استانادا جەڭىل اتلەتيكادان ءامين تۇياقوۆ جۇلدەسىنە ارنالعان Astana Indoor Meet حالىقارالىق ءتۋرنيرى اياسىندا كوزگە ءتۇسىپ قالعان ەدى. دەرەكتەرگە سۇيەنسەك، بەلدى شەنەۋنىك ءقازىر جەڭىل اتلەتيكا فەدەراسياسىنىڭ پرەزيدەنتى بولىپ وتىر. شىعىس قازاقستاندى تاپجىلماي 9 جىل باسقارعان ەكس-اكىم وسىلاي سپورتتى تىزگىندەۋگە ويىسىپتى.
بۇعان دەيىن دە قوعامدا ۇلتتىق وليمپيادا كوميتەتىنىڭ باسشىلىق قۇرامىنا قاتىستى قىزۋ داۋ ءجۇرىپ جاتىر. دەپۋتاتتار دا بۇل ماسەلەنى بىرنەشە مارتە كوتەردى. ماسەلەن، باپي قۇلىبايەۆتى اشىق سىناپ تاستاپ ەدى.
"ونىڭ ويى ەلدىڭ مۇنايىن ساتىپ، قالتاسىن تولتىرۋ. سپورتتى قايتسىن؟! ...پاريج وليمپياداسى قارساڭىندا مۇنداي جاعدايعا مۇلدەم جول بەرىلمەۋى ءتيىس! ۇلتتىق وليمپيادا كوميتەتىنە تۇبەگەيلى وزگەرىستەر كەرەك"، - دەگەن ەدى ول.
