Almatyda “Pavlin Mavlin” meiramhanasynyń ákimshisi qazaq tilinde qyzmet kórsetýden bas tartqan. Atalǵan oqiǵany video avtory áleýmettik jelidegi paraqshasyna júktedi, dep habarlaidy Dalanews.kz.
Alina esimdi video avtorynyń aitýynsha, ol dámhana ákimshiliginen qazaq tilinde qyzmet kórsetýin suraǵan. Alaida ákimshilik olardyń talabyn oryndamai, dóreki jaýap bergen.
"Men qazaqsha sóilep turmyn, qazaqsha jaýap berińizshi. Bul Qazaqstan, bárimiz qazaq tilin bilýimiz kerek emes pe? Siz ákimshisiz. Demek siz de qazaqsha bilýińiz kerek. Qazaqstan Respýblikasynda qyzmetkerler qazaq tilin bilýge mindetti emes pe?", - deidi video avtory.
Alaida ákimshi “men eshkimge eshteńe mindetti emespin” dep dóreki túrde jaýap begen. Sonymen qatar video avtoryna qoqan-loqy kórsetken.
“Sizdi “qara tizimge” engizemin. Endi bul jerge aiaq basa almaisyz”, - deidi ákimshi.
Bul oqiǵa áleýmettik jelide qyzý talqylanyp, kópshiliktiń synyna ushyrady.
Atalǵan oqiǵaǵa qatysty meiramhana basshylyǵy jaýap qatty. Olar bul másele boiynsha tekseris júrgizilip jatqanyn málimdedi.
“Pavlin Mavlin” meiramhanasy Qazaqstan Respýblikasynyń zańdaryn jáne memlekettik tildi qurmetteidi. Biz qonaqtarǵa qazaq, orys jáne aǵylshyn tilderinde qyzmet kórsetemiz. Áleýmettik jelilerde jariialanǵan beinematerial qosymsha zerdeleýdi qajet etedi. Qazirgi ýaqytta ishki tekserý júrgizilip jatyr. Tekserý aiaqtalǵanǵa deiin biz egjei-tegjeili túsinikteme berýden bas tartamyz. Tekserý nátijeleri boiynsha tiisti sharalar qabyldanady”, — delingen habarlamada.
Eske salaiyq, buǵan deiin Shymbulaqta ornalasqan meiramhananyń ákimshisi qazaqsha qyzmet kórsetýden bas tartyp, halyqtyń ashýyna tigen edi.
Oqiǵa taý-shańǵy kýrortynda ornalasqan Gusto meiramhanasynda bolǵan. Bul týraly áleýmettik jeli qoldanýshysy paraqshasynda jazǵan. Atalǵan jaǵdaiǵa bailanysty kúni keshe ishki tekserý aiaqtalyp, meiramhana ákimshisiniń qyzmetinen bosatylǵany belgili boldy.
