2026 jyldyń basynda kásipkerlerdiń túrli qaýymdastyqtary birigip, «Atameken» palatasyna jarna jinaýǵa qarsy petitsiia jariialaýǵa daiyndala bastady. Bul týraly DALA INSIDE derekkózi aityp otyr. Olardyń oiynsha, qazirgi tańda bul palatadan bizneske eshqandai paida joq. Kerisinshe «Atameken» ulttyq palatasy kásipkerlerdiń damýyna kedergi keltiretin qosymsha barerge ainalyp barady.
«Shaǵyn kásipkerlerdi bylai qoiǵanda, Atameken orta biznestiń de, iri biznestiń de korporativti jáne qosymsha qun salyǵy boiynsha quqyqtaryn qorǵai almady. Usaq-túiek korrektirovkalar bolmasa, Úkimetke múlde sózin ótkize alǵan joq. Kei kezde biznesti ádeii jyǵyp berip otyrǵandai áser qaldyrdy. Kásipkerler «onda palatanyń shyǵynyn biz emes, Úkimet tólesin degen pikirde». Jalpy kelesi jyly «Atameken» palatasyna óziniń qajet qurylym ekenin dáleldeý qiyn soqpaq. Kásipkerler palatadan syrt ainala bastady. Jańa Salyq Kodeksin ótkizip alǵan Úkimetke de endi mundai uiymnyń qajeti shamaly», - deidi, DALA INSIDE derekkózi.
Eger kelesi jyly Atameken men kásipkerler arasyndaǵy teketires qyza tússe, 2027 jyldary osy palatany taratý men jabý týraly másele úlken tribýnalardan kóterilýi múmkin. Palatanyń qazirgi tóraǵasy Raiymbek Batalov óte sylbyr jumys isteitindei áser qaldyrady. Basynda sheneýik emes, biznes ókili bolǵandyqtan Batalovqa kásipkerler tarapynan zor úmit artylǵan edi. Ol úmit aqtalmaǵan siiaqty. Tipti salystyrmaly túrde, burynǵy tóraǵa Myrzahmetovke qaraǵanda Batalovtyń daýysy múlde estilmeidi.
«Batalov bolsyn, basqasy bolsyn, dál personaliige taqalyp turǵan eshteńe joq. Basqa tóraǵa bolsa da, Atameken keremet tiimdi bola almaidy. Másele uiymnyń arhitektýrasynda. Atameken qurylǵan kezinde sol ýaqytta týǵan problemalardy tez sheshýge arnalyp jasalǵan bolatyn. Ol problemalar sheshildi, ýaqyt artta qaldy, múlde basqa zaman ornady. Qazir mundai palata shynymen de kerek emes. Nemese ony kapitaldy túrde múlde qaita qurý kerek», - deidi, derekkóz.
«Atameken» ulttyq kásipkerler palatasynyń biylǵy biýdjeti 12 milliard teńgeden asady. Onyń 10,7 milliard teńgesin kásipkerler jarna túrinde jinap beredi. Negizgi jarnany palata iri biznesten alady. Úkimet bekitken shekti mólsherden aspasa, osy jarnany shyǵyndarǵa jatqyzyp, odan salyqty shegerýge múmkindik bar.
Osy 12 milliard teńgeniń basym bóligin palata jalaqy tóleý, arenda tóleý, taýar men jumys qyzmetterine jumsaidy. Syrtynan qaraǵanda, ata-anasy alyp bergen balmuzdaqty jep otyrǵan kishkentai bala siiaqty. Kishkentai balanyń ata-anasyna esh kómektese almaityny túsinikti. Kásipkerler de sol úshin «mundai palata bizge kerek pe?» degen suraq qoiyp otyr.
