Memleket basshysy Qasym-Jomart Toqaev Ulttyq quryltaidyń úshinshi otyrysynda esirtki óndiretin adamdarǵa qatań jaza taǵaiyndaýdy usyndy, dep habarlaidy Dalanews.kz.
Ol eń aldymen jaqsylyqqa qol jetkizý úshin, jaǵymsyz ádetterden arylý kerek ekenin atap ótti.
"Jaqsydan úirenip, jamannan jirene bilýimiz qajet. Iaǵni, shyn máninde ozyq ult bolý úshin jaqsylyqqa umtylýmen qatar, elimizdiń ósip-órkendeýine kedergi bolatyn jaman ádet, jaǵymsyz qylyq jáne qaýipti keselden qutylýymyz kerek. Bul – ulttyń jańa sapasyn qalyptastyrý jolyndaǵy óte mańyzdy qadam. Uly Abai "Bes nárseden qashyq bol, bes nársege asyq bol" degen. Bul – árine, eshqashan eskirmeitin, mán-mańyzyn joǵaltpaityn ósiet. Biraq ár zamannyń ózine tán syn-qaterleri bar. Jahandaný úrdisine, jańa tehnologiianyń damýyna jáne basqa da sebepterge bailanysty qoǵamǵa qaýipti jańa keselder paida boldy. Ásirese, biz mynadai bes keselmen búkil el bolyp kúresip, birjola tosqaýyl qoiýymyz kerek. Aldymen, esirtki saýdasy, sonyń ishinde sintetikalyq esirtki ainalymy. Ókinishke qarai, bul indet jappai beleń alyp barady. Tek byltyrdyń ózinde esirtkige qatysty 7,5 myńnan astam qylmys anyqtaldy. Zańsyz ainalymnan 41 tonna esirtki alyndy", - deidi Toqaev.
Osy tusta memleket basshysy nashaqorlyqty nasihattap júrgen adamdardyń jazasyn qatańdatýdy usyndy.
"Nashaqorlyq, ásirese, balalar arasynda tez taralyp, jastarymyz ýlanyp jatyr. Esirtkimen kúres belsendi júrgizilmese, erteń bári kesh bolýy múmkin. Qazir esirtki satqan qylmysker qatań jazaǵa tartylady. Meniń usynysym: esirtki zattaryn óndiretin adamdardyń jazasyn barynsha qataitý kerek. Ony eń aýyr qylmystarǵa teńestirý qajet. Parlamentti bul bastamany qoldaýǵa shaqyramyn", - dedi Prezident.
