IIM Qylmystyq atqarý júiesi komitetindegiler jemqorlyq pen qyzmetin asyra paidalanǵany úshin sottalǵan birneshe qazaqstandyq sheneýnik qai jerde jazasyn ótep jatqanyn aitty, - dep habarlaidy Dalanews.kz.
2016 jyly asa iri kólemde para alǵan "Astana EKSPO-2017" ulttyq kompaniiasynyń eks basshysy, burynǵy týrizm jáne sport ministri Talǵat Ermegiiaev sottalǵan bolatyn.
Al byltyr eńbek jáne halyqty áleýmettik qorǵaý vitse-ministri bolǵan Nurjan Áltaev jáne Indýstriia jáne infraqurylymdyq damý vitse-ministri Timýr Toqtabaev ta sottalǵan bolatyn.
QAJD ókilderi Tengrinews.kz redaktsiiasynyń resmi saýalyna bergen jaýabynda sottalǵandar jazasyn qylmystyq-atqarý júiesiniń aralas qaýipsizdik mekemelerinde ótep jatqanyn aitty.
"Sottalǵandar penitentsiarlyq mekemelerde jalpy negizde jazasyn ótep jatyr. Olardyń tártibi jaqsy", - delingen habarlamada.
Buǵan deiin Ermegiiaevtiń túrmede jeke kabineti bolǵan degen qaýeset taraǵan bolatyn. QR Bas prokýratýrasy zańdyq kúshine engen úkimderdiń zańdylyǵyn jáne olardyń oryndalýyn qadaǵalaý qyzmetiniń bastyǵy Qairat Jaqypbaev jýrnalistermen baspasóz maslihatyn ótkizip, "Astana EKSPO-2017" ulttyq kompaniiiasynyń burynǵy basshysyna túrmede jasalǵan jaǵdai týraly aityp berdi.
"Shyn máninde Ermegiiaev VIP-kamerada otyrdy degen aqparat shyndyqqa janaspaidy. Tek jazasyn óteý mekemesinde oǵan arnaiy kabinet jabdyqtalǵan. Oǵan qosa, Ermegiiaev otyrǵan kamerada oǵan belgili bir dərejede jeńildikter berilgen», - dedi Qairat Jaqypbaev.
Sondai-aq, Jaqypbaevtyń sózine súiensek, sottalǵan azamatqa kúndiz azdap erkindik berilgenimen, túnde ol kamerasynda jatqan.
"Bul oqiǵaǵa qatysty qylmystyq is qozǵalyp, qyzmetkerler jumystan shyǵaryldy. 16 adam jazaǵa tartyldy. Qańtar aiynda prokýrorlar barlyq túzeý mekemelerin tekserip shyqty. Onda sottalǵan azamattardan uialy telefon, turmystyq tehnika, kilem men jihazdar tabylǵan", - dedi Jaqypbaev.
