Memlekettik keńesshi Erlan Qarin Almatyda BUU Balalar qorynyń (IýNISEF) Eýropa jáne Ortalyq Aziia boiynsha aimaqtyq direktory Redjina De Dominichispen kezdesti dep habarlaidy Dalanews.kz.
Erlan Qarin balalardy qorǵaý jáne olardyń qaýipsizdigin saqtaý memlekettik saiasattyń basym baǵyty ekenin ári bul másele el Prezidentiniń jiti nazarynda turǵanyn atap ótti. Sonymen qatar Qazaqstanda balalar quqyǵyn qorǵaýdyń zańnamalyq jáne institýtsionaldyq negizderi qalyptasqanyn aitty. Máselen, áielderdiń quqyqtary men balalardyń qaýipsizdigin qamtamasyz etetin zań qabyldandy. Zańǵa sáikes býlling úshin jaýapkershilik engizilip, zorlyq-zombylyqtyń barlyq túrine qatysty jaza kúsheitildi. Qabyldanǵan sharalardyń nátijesinde balalarǵa qatysty asa aýyr qylmystar 30 paiyzǵa, al balalar men jasóspirimderdi jynystyq qatynasqa túsýge májbúrleý qylmystary 12,5 paiyzǵa azaidy.
Sondai-aq balalardy qorǵaýdyń túrli aspektilerine, atap aitqanda, balalar men otbasylarǵa kómek kórsetý infraqurylymyna, turǵyn úimen qamtamasyz etý, zorlyq-zombylyq pen sýitsidtiń aldyn alý sharalaryn engizýge qatysty 7 zańǵa ózgerister men tolyqtyrýlar engizildi. Balalardyń quqyqtaryn qorǵaý júiesin jetildirý jumysy jalǵasýda.
«Adal azamat» birtutas tárbie baǵdarlamasy qabyldanyp, iske asyrylýda. «Qazaqstan balalary» keshendi baǵdarlamasy múddeli memlekettik organdarmen kelisilýde.
Buǵan qosa bala quqyqtaryn qorǵaý júiesin óńirlik deńgeide odan ári nyǵaitý isi jalǵasyp jatyr. Osy baǵytta bala quqyqtary jónindegi basqarmalar qurylyp, qorǵanshylyq uiymdarynyń shtaty ulǵaiýda.
Redjina De Dominichis Qazaqstannyń bala quqyqtaryn qorǵaý salasynda qabyldaǵan sharalaryn joǵary baǵalady. Sondai-aq elimizdiń bul rette óńirge ǵana emes, Eýropanyń birqatar memleketine úlgi bolyp otyrǵanyn aitty.
IýNISEF aimaqtyq direktory Qazaqstannyń MICS-2024 baǵdarlamasyndaǵy (mýltiindikatorlyq klasterlik zertteý) jekelegen baǵyttar boiynsha jaqsy nátijege qol jetkizgenin eske saldy.
De Dominichis hanym balalardyń quqyqtaryn qorǵaý jónindegi naqty jumys tetikterine oń baǵa berip, elimizdiń tájiribesin basqa memleketterge usynýǵa daiyn ekenin jetkizdi. Ol Qazaqstan Prezidentiniń osy saladaǵy reformalary balalardy qorǵaý isine serpin ákelgenin atap ótti.
Kezdesý sońynda taraptar yntymaqtastyqty odan ári nyǵaitýǵa jáne bolashaq urpaq múddesine sai birlesken bastamalardy júzege asyrýǵa nietti ekenin rastady.
