Qazaqstan Respýblikasynyń Memlekettik keńesshisi Erlan Qarin "Birlik pen damý: Memleket basshysy Qasym-Jomart Toqaevtyń saiasi baǵdarynyń basty negizderi" atty maqalasynda "Ádiletti Qazaqstan" uǵymynyń máni qanshalyq tereń ekenin aitty, - dep habarlaidy Dalanews.kz.
Memlekettik keńesshi búginde ishki saiasat salasyndaǵy aqparat aǵyny jyldam almasyp otyratynyn, soǵan orai belgili bir kezeńde saiasi reformalar, sailaýlar men kadrlyq aýys-túiister el nazarynda ekenin málimdedi. Erlan Qarin búginde otbasylyq zorlyq-zombylyq, qarǵyn sýmen kúres máselesi de kún tártibine shyqqanyn aitty. Alaida "bilik qurylymdary túgeldei kúndelikti máselelermen ainalysyp jatqanyna qaramastan, memlekettik saiasattyń negizgi baǵdaryna sáikes ilgerileý úshin júieli jumys jalǵasyp keledi", - dedi ol bul baǵytta.
"Damýdyń jańa kezeńine qadam basqan Qazaqstannyń ideologiialyq tuǵyrnamasyn Memleket basshysy Qasym-Jomart Toqaev naýryz aiynda Atyraýda ótken Ulttyq Quryltaidyń úshinshi otyrysynda aiqyndap berdi. "Ádildik" degen aýqymdy uǵym osy ideologiianyń arqaýyna, al "Ádiletti Qazaqstan" degen túsinik memleket baǵdarynyń basty ideologemasyna ainaldy.
"Ádiletti Qazaqstan" – bir jaǵynan memlekettik ideologiianyń ózegi ári memlekettik saiasattyń túpki maqsaty. Sonymen birge bul – qoǵam sanasyna ornyqqan bolashaqtyń bet-beinesi. Shyn máninde, "Ádiletti Qazaqstan" ideiasy kúni keshe ǵana nemese jurt aityp júrgendei, sońǵy eki-úsh jylda ǵana paida bolǵan joq. Qasym-Jomart Toqaev Prezident qyzmetine kelgen kúnnen bastap ádildiktiń qasterli qaǵidatyna airyqsha mán berdi.
Qasym-Jomart Toqaev Prezident laýazymyna kiriskennen keiingi alǵashqy sózinde: "Elimizdiń damý jolyndaǵy osy mańyzdy mezette búkil qoǵam bolyp, órkendegen, demokratiialyq, ádiletti Qazaqstandy qurý ideiasynyń tóńiregine toptasýy kerek» degen edi. Odan keiin 2019 jáne 2022 jyly ótken prezident sailaýy kezinde Memleket basshysy "Ádildik" uǵymyn sailaý aldyndaǵy tuǵyrnamasyna negiz etip alyp, óz saiasatynyń basty qaǵidaty retinde ustanyp keledi. Ádiletti memleket qurý ideiasy qasiretti qańtar oqiǵasynan keiin memlekettik saiasattyń ǵana emes, búkil qoǵamnyń ideologiialyq temirqazyǵyna ainaldy", - dedi Erlan Qarin.
Memlekettik keńesshiniń sózinshe, ádildik ideiasy qoǵamnyń suranysyna da, memlekettiń ustanymyna da sai keledi. Iaǵni "Ádiletti Qazaqstan" ultty uiystyratyn ideiaǵa ainalyp otyr.
"Osy oraida, "ádildik" jáne "ádiletti memleket" degen terminderdiń mán-maǵynasyn naqtylai ketken jón. Ádildik degenimiz – bárin bir qalypqa salyp, teńestirý emes. Ádildik – eń aldymen, quqyqtar men mindetterdi bárine birdei bólý degen sóz. "Ádildik" uǵymyn dál osylai uǵynyp, túisiný qajet. Ol barlyq reformanyń ón boiynda tur", - dedi ol.
Erlan Qarin sońǵy jyldary memlekettik deńgeidegi kóptegen sheshim osy ádildik ideiasyna orai qabyldanyp kele jatqanyna da nazar aýdardy.
"2022 jyly júrgizilgen konstitýtsiialyq reforma aiasynda halyqtyń jerge jáne onyń qoinaýyndaǵy bailyqqa, janýarlar jáne ósimdikter álemine, sondai-aq basqa da tabiǵi resýrstarǵa qatysty menshik quqyǵy Ata zańymyzda bekitildi. Bul qaǵidat is júzinde "Ulttyq qor – balalarǵa" atty baǵdarlama arqyly júzege asyryldy. Soǵan sáikes budan bylai Ulttyń qordyń jyl saiynǵy investitsiialyq tabysynyń jartysy balalarǵa arnalǵan jinaqtaýshy esepshottarǵa teń bólip aýdarylady.
Sondai-aq ádildik qaǵidatynyń naqty júzege asyrylyp jatqanyna mysal retinde kezinde zańsyz alynǵan, jalpy somasy 1 trillion teńgeden asatyn aktivterdiń elge qaitarylǵanyn, paidalanylmai kelgen 5 million gektardan astam jerdiń memleket menshigine ótkenin, sonymen birge "Qazaqstan halqyna" qoǵamdyq qorynyń qurylǵany men "Samuryq-Qazyna" qorynyń taza tabysynyń keminde 7 paiyzy jyl saiyn osy qordyń esepshotyna aýdaryla bastaǵanyn atap ótýge bolady.
Shyn máninde, Ádiletti Qazaqstan – bázbireýler aityp júrgendei, biliktiń oilap tapqan jasandy ideiasy emes, Prezidenttiń strategiialyq baǵdarynyń ideialyq negizi. Qasym-Jomart Toqaev óziniń eń negizgi missiiasy – Ádiletti Qazaqstandy qurý ekenin únemi aityp júr. Saiasi, ekonomikalyq jáne áleýmettik-mádeni salalarda júrgizilip jatqan júieli reformalardyń bári, eń aldymen, osy strategiialyq maqsatqa qol jetkizýge arnalǵan. Prezidenttiń elimizdi túbegeili jáne jan-jaqty jańǵyrtýǵa qatysty baiyptamasynyń túpki máni osynda jatyr", - dedi Memlekettik keńesshi.
