"Erlan Bilálǵa qatysty QR Qylmystyq kodeksiniń 366-babynyń 2-bóligi jáne 24-babynyń 3-bóligi boiynsha qozǵalǵan is Almaty qalasynyń Almaly aýdandyq sotyna tústi", – dep habarlady qalalyq sottyń baspasóz qyzmetindegiler.
Sottyń málimetinshe, Erlan Bilál "Sezam" qoǵam qaiyrymdylyq-shyǵarmashylyq qorynyń jetekshisinen 2017 jyldyń 23 jeltoqsanynan 2018 jyldyń 7 qańtary aralyǵynda birlesken teatr qoiylymdary jaily qujatqa qol qoidyrý úshin 900 myń teńge kóleminde para aldy degen kúdikke ilindi. Osyǵan deiin Erlan Biláldiń 1 205 000 teńge kepilmen bosatylǵany habarlanǵan edi.
"2018 jyldyń 9 qańtarynda Almaty qalasynyń Medeý aýdandyq №2 sotynyń tergeý sýdiasy Muhtar Áýezov atyndaǵy Qazaq memlekettik akademiialyq drama teatr direktoryna qatysty bultartpaý sharasy retinde kepilge alý týraly sheshim shyǵardy. 1 million 205 myń teńge kóleminde kepil tólendi", - degen edi sottaǵylar.
Eske sala keteiik, QR Eńbek sińirgen qairatkeri Erlan Bilál 5 qańtarda 1,5 million teńge paramen ustalǵan bolatyn. "Muhtar Áýezov atyndaǵy Qazaq memlekettik akademiialyq drama teatrynyń direktory Almatyda Jańa jyl kezinde balalarǵa qoiylym qoiý maqsatynda teatrdan oryn berý úshin zańdy tulǵadan 1,5 million teńge para aldy degen kúdikke ilindi. Kinásin tolyq moiyndaýyna bailanysty ol qamaýǵa alynǵan joq. Sotqa deiingi tergeý sharalary júrip jatyr", – dep habarlaǵan edi.
QR Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahin. Al 9 qańtarda Áýezov teatry direktory mindetin atqarýshy taǵaiyndalǵan bolatyn.
"Qazaqstan Respýblikasy Mádeniet jáne sport ministrliginiń "Muhtar Áýezov atyndaǵy Qazaq memlekettik akademiialyq drama teatry" Respýblikalyq memlekettik qazynalyq kásipornynyń direktory Bilálov Erlan Ábdildauly 2018 jyldyń 4 qańtarynda istiń mán-jaiy anyqtalǵansha qyzmetinen shettetildi. Shettetilgen ýaqytta mindetti direktordyń shyǵarmashylyq is boiynsha orynbasary Jandarbek Alaidaruly atqarady", – delingen edi ministrlik habarlamasynda.
https://dalanews.kz/33294
