Almatyda Áýezov teatrynyń basshysy Erlan Biláldiń isine qatysty kezekti sot otyrysy ótti. Erlan Biláldiń qorǵaýshysy taǵy da isti BAQ-tyń qatysýynsyz qaraý týraly ótinish bildirdi dep jazady QazAqparat.
Al kýáger retinde qatysyp jatqan Qairat Baianovtyń qorǵaýshysy ony azamattyq talap qoiýshy dep tanýdy surady.
«Biz Baianovty qylmystyq protseste azamattyq talap qoiýshy dep taný týraly ótinish berdik. Aiyptaý aktisimen belgilengen, onyń ústine aiyptalýshynyń ózi de joqqa shyǵarmai otyrǵan jait, ol Baianovtan 600 myń teńge mólsherinde aqsha alǵan. Biz bul aqshany iesine qaitarý týraly azamattyq talap qoidyq. Jalpy shyǵyn mólsheri 600 myń teńge – Baianov óz qarajattary esebinen bergen soma. Ol qylmystyq istiń materialdaryna qosylǵan joq. Biz, sondai-aq Baianovqa keltirilgen múliktik zalaldy da qostyq, qorǵaýshy shyǵynyna 50 myń teńge, osy iske qatysty kýágerge júktelgen ózge shyǵyndar úshin 21 myń teńge. Osy qarajatty óteýdi suraimyz», – dedi Qairat Baianovtyń qorǵaýshysy Ramilia Muhamedieva.
Aita keteiik, sotta jýrnalisterge aýdiojazba, foto-videoǵa túsirý tyiym salyndy. Alaida sot protsesine qatysýǵa ruqsat berildi. Sotqa sýdia Qýanysh Áripov tórelik etýde.
Sotqa deiingi tergeý amaldarynyń málimetine súiensek, Bilálov “Sezam” qoǵamdyq qaiyrymdylyq qorynyń prezidenti Qairat Baianovtan 1,5 million teńge kóleminde para almaqshy bolǵan.
Qairat Baianov ázirge sotqa kýáger retinde qatysýda.
Eske sala keteiik, Áýezov atyndaǵy Qazaq memlekettik akademiialyq drama teatrynyń direktory Erlan Bilál para alý kezinde ustalǵan edi. Buǵan deiin Bilál 1 million 205 myń teńge kóleminde kepilge aqsha tólegen edi.
