Búgin Almatyda qala jurtshylyǵy belgili qazaqstandyq kompozitor Erkesh Shákeevtiń 25 jastaǵy uly Safar Shákeevti aqtyq saparǵa shyǵaryp salýǵa jinaldy.
«Qazaqkontsert» zalynda ótken qaraly jiynǵa belgili qoǵam jáne mádeniet qairatkerleri, óner juldyzdary, Almaty qalasy ákiminiń orynbasary Arman Qyryqbaev, sondai-aq Safar Shákeevtiń dostary men áriptesteri, ony izdeý sharalaryna qatysqan volonterler, qarapaiym qala turǵyndary kelip, marqumnyń otbasy men týǵan-týystaryna qaiǵyryp kóńil aitýda.
«Qazaqkontsert» zaly halyqqa lyq toldy dese de bolady. Safardyń dostary men áriptesteri ústerine Safardyń beinesi salynǵan jeide kiip keldi.
«Safar ómirdi sheksiz súietin meniń aiaýly da meiirimdi dosym edi. Ol meni kezinde Almatyǵa jumysqa shaqyrǵan. Jumys barysynda biz dostasyp kettik. Biz meiirimdi, aiaýly dosymyzdan airylyp otyrmyz. Ol ómirdi, ata-anasyn, týǵan-týystaryn, dostaryn keremet jaqsy kórdi. Ol rejisser bolatyn. Kinoindýstriia salasynda aldyna qoiǵan josparlary kóp edi.
Biz Safardy máńgi este saqtaý úshin endi birqatar sharalardy júzege asyramyz. Biz 11 kún boiy volonterlar qatarynda bolyp, izdeý sharalaryna qatystyq. Úmitimiz zor edi. Amal qansha, ókinishten ózegimiz órtenedi.
Safardyń asyl beinesi jadymyzda máńgige saqtalady», — dedi Safardyń dosy Rústem Tóreǵaliev.
Safar Shákeev Keńsai-2 ziratyna Batyrhan Shúkenovtiń qasyna jerlenedi.
Sýretter: kaz.365info.kz saitynan alyndy.
