Soǵysty zertteý institýtynyń (ISW) habarlaýynsha, Reseidegi aimaqtarda eriktiler aqysyn tóleý sharttary ózgergenin alǵa tartty.
Aitalyq, Bashqurtstanda erikti retinde jazylǵandarǵa arnalǵan 200 myń rýbl kólemindegi bir rettik tólem 90 kún boiy joldanbaitynyn aimaq ákimshiligi alǵa tartty.
2 myń rýbl kólemindegi táýlik aqysy aiyna bir márte tólenedi. Saratov oblysyndaǵy áskeri bólimderge qosylǵandar da 150 myń rýbl kólemindegi bir rettik tólemdi kelisim-shartqa qol qoiǵannan úsh aidan keiin ǵana alady.
ISW sarapshylarynyń pikirinshe, eriktiler aqshany alyp, Ýkrainadaǵy soǵysqa barmai qoia ma degen qaýippen aqy tóleý sharttaryn ózgerńp jatqanyn alǵa tartty. Onyń ústine, aimaqtarda eriktilerge tóleitin qarajat jetispeýi de múmkin.
Ótken aptada "Agal" chývash batalony sapynda Ýkrainadaǵy soǵysta júrgen qyryqtan astam erikti kelisim-sharttaǵy bir rettik tólem men táýlik aqysy tólenbegenine shaǵymdanǵan bolatyn.
Chývashiia basshysy Oleg Nikolaevtyń 11 shildede qol qoiǵan jarlyǵyna sáikes, 50 myń rýbl kelisim-shart jasalǵan sátte tólenip, qalǵany úsh aidan soń joldanýy tiis.
Jaýyngerler úndeýinde bir rettik tólem, eki myń rýbl kólemindegi táýlik aqysy da tólenbegeni aitylǵan.
Resei aimaqtarynda eriktilerden turatyn batalondar 2022 jyldyń kókteminde jasaqtala bastady. Sodan beri Máskeý, Sheshenstan, Tatarstan, Bashqurtstan, Perm ólkesi, Kirov jáne Nijegorodsk oblystarynyń batalondary paida boldy. Eriktiler Qorǵanys ministrligimen kelisim-shartqa otyrady.
Eriktiler qabyldaý "astyrtyn mobilizatsiianyń" bir túrine ainaldy. Ony áskeri komissariattar ǵana emes, "Vagner" sekildi jekemenshik áskeri kompaniialar da uiymdastyryp jatyr.
