سوعىستى زەرتتەۋ ينستيتۋتىنىڭ (ISW) حابارلاۋىنشا، رەسەيدەگى ايماقتاردا ەرىكتىلەر اقىسىن تولەۋ شارتتارى وزگەرگەنىن العا تارتتى.
ايتالىق، باشقۇرتستاندا ەرىكتى رەتىندە جازىلعاندارعا ارنالعان 200 مىڭ رۋبل كولەمىندەگى ءبىر رەتتىك تولەم 90 كۇن بويى جولدانبايتىنىن ايماق اكىمشىلىگى العا تارتتى.
2 مىڭ رۋبل كولەمىندەگى تاۋلىك اقىسى ايىنا ءبىر مارتە تولەنەدى. ساراتوۆ وبلىسىنداعى اسكەري بولىمدەرگە قوسىلعاندار دا 150 مىڭ رۋبل كولەمىندەگى ءبىر رەتتىك تولەمدى كەلىسىم-شارتقا قول قويعاننان ءۇش ايدان كەيىن عانا الادى.
ISW ساراپشىلارىنىڭ پىكىرىنشە، ەرىكتىلەر اقشانى الىپ، ۋكرايناداعى سوعىسقا بارماي قويا ما دەگەن قاۋىپپەن اقى تولەۋ شارتتارىن وزگەرڭپ جاتقانىن العا تارتتى. ونىڭ ۇستىنە، ايماقتاردا ەرىكتىلەرگە تولەيتىن قاراجات جەتىسپەۋى دە مۇمكىن.
وتكەن اپتادا "اگال" چۋۆاش باتالونى ساپىندا ۋكرايناداعى سوعىستا جۇرگەن قىرىقتان استام ەرىكتى كەلىسىم-شارتتاعى ءبىر رەتتىك تولەم مەن تاۋلىك اقىسى تولەنبەگەنىنە شاعىمدانعان بولاتىن.
چۋۆاشيا باسشىسى ولەگ نيكولايەۆتىڭ 11 شىلدەدە قول قويعان جارلىعىنا سايكەس، 50 مىڭ رۋبل كەلىسىم-شارت جاسالعان ساتتە تولەنىپ، قالعانى ءۇش ايدان سوڭ جولدانۋى ءتيىس.
جاۋىنگەرلەر ۇندەۋىندە ءبىر رەتتىك تولەم، ەكى مىڭ رۋبل كولەمىندەگى تاۋلىك اقىسى دا تولەنبەگەنى ايتىلعان.
رەسەي ايماقتارىندا ەرىكتىلەردەن تۇراتىن باتالوندار 2022 جىلدىڭ كوكتەمىندە جاساقتالا باستادى. سودان بەرى ماسكەۋ، شەشەنستان، تاتارستان، باشقۇرتستان، پەرم ولكەسى، كيروۆ جانە نيجەگورودسك وبلىستارىنىڭ باتالوندارى پايدا بولدى. ەرىكتىلەر قورعانىس مينيسترلىگىمەن كەلىسىم-شارتقا وتىرادى.
ەرىكتىلەر قابىلداۋ "استىرتىن موبيليزاسيانىڭ" ءبىر تۇرىنە اينالدى. ونى اسكەري كوميسسارياتتار عانا ەمەس، "ۆاگنەر" سەكىلدى جەكەمەنشىك اسكەري كومپانيالار دا ۇيىمداستىرىپ جاتىر.
