Reseıdiń Syrtqy ister mınıstriligi de Túrkıadaǵy azamattaryn qaýipsiz orynda qalýdy, Túrkıaǵa demalýdy josparlaǵan el azamattaryn asyqpaýǵa shaqyrǵan. Sol sıaqty Brıtan bıligi de osy mándes málimdeme jasady.
Áskerı búlik barysynda 60-qa jýyq adam qaza bolǵany málim boldy. Túnde áskerıler Túrkıanyń ulttyq telearnasy TRT basyp alǵan edi. Biraq keıinnen olar telearna ǵımaratyn bosatqan. Áskerı búlikshiler elde tótenshe jaǵdaı engizilgenin aıtqan-dy. Al resmı bılik bolsa, búlikshilerdiń tolyqtaı joly kesilgenin málimdedi.
Túrkıa prezıdenti Taıyp Erdoǵan Ystambýlda jasaǵan málimdemesinde áskerı búlikke Fetýllah Gúlendi aıyptaǵan-dy. Biraq Gúlenniń Túrkıadaǵa jaqtastary bul iske ózderińniń eshqandaı qatys joq ekenin alǵa tartty.
Sońǵy málimetter boıynsha áskerıler Túrkıa prezıdentiniń rezıdensıasyn tikushaqpen shabýyl jasaǵan. Biraq Erdoǵanǵa baǵynatyn eldiń áskerı áýe kúshteriniń ushaqtary dereý áýege kóterilip, tikushaqtyń kózin joıǵan.
Sondaı-aq, F-16 joıǵysh ushaqtary búlikshilerdiń qolyndaǵy tankterge áýeden soqqy bergeni de málim boldy.
AQSH-ǵy túrikter áskerı búlikti qoldamaıtyndaryn bildirip, kóshege shyqty. Olar Túrkıada áskerılerdiń bılikti basyp ala berýinen mezi bolǵanyn ashyq aıtty. Olar bılik tıimdi jumys istemese, demokratıalyq jolmen aýysýyna jaqtaıtynyn alǵa tartqan.
