Rýslan Jeldibai Toqaevtyń biylǵy alǵashqy memlekettik saparyn Túrkiia elinen bastaǵanyn atap ótip, bul jolǵy sapardyń mazmuny men maǵynasy eki el úshin de erekshe bolǵanyn aitty.
"Memlekettik sapar - Qazaqstan Respýblikasy Prezidentiniń sheteldik saparlarynyń ishinde airyqsha joǵary deńgeige ie.
Osy oraida Prezidenttiń mundai deńgeidegi saparyn Qazaqstan táýelsizdigin alǵash moiyndaǵan baýyrlas Túrkiia elinen bastaýy erekshe simvoldy maǵynasy bar.
Memleket basshysy ushaqtan túsken boida zamanaýi Túrkiia memleketiniń negizin qalaýshy Atatúriktiń memorialyna baryp, uly qairatkerdiń beiitine ziiarat jasady.
Keiin Prezident Túrkiia basshynyń saraiyna bet aldy. Munda Qasym-Jomart Toqaevty Rejep Taiyp Erdoǵan erekshe saltanatpen qarsy aldy", – dedi prezidenttiń baspasóz hatshysy.
Onyń aitýynsha Qazaqstan delegatsiiasy baýyrlas elderge tán qarym-qatynasty túrik ultynyń árbir isinen, sózinen, áreketinen sezingen. Prezident Toqaev Túrkiianyń táýelsizdigimizdi alǵash moiyndaǵan el ekenin aityp, baýyrlas, týystas, dostas eldiń bul qadamyn qazaq halqy eshqashan umytpaitynyn jetkizgen.
"Bul jolǵy sapardyń mazmuny men maǵynasy eki el úshin de erekshe. Kelissózder nátijesinde 14 mańyzdy qujatqa qol qoiyldy. Olar áskeri, saýda, mádeniet, ekonomika jáne basqa da salalaryn qamtidy.
Mysaly, Qazaqstan men Túrkiia ANKA ushqyshsyz barlaý apparattaryn birlesip óndirýge kelisti - Qazaqstan mundai kelisimge qol jetkizgen alǵashqy el.
Sapardyń ekinshi kúni Prezident Túrkiianyń iri biznes ókilderimen kezdesip, kásipkerlerdi qandai suraq mazalaitynyn surady. Ashyq áńgime barysynda kóptegen problema kóterilip, prezident olardy júieli túrde sheshýge tapsyrma berdi.
Jasalǵan kelisimsharttardyń tolyq oryndalýyn óziniń jeke baqylaýynda bolatynyn aityp, túrik baýyrlardy Qazaqstanǵa investitsiia quiýǵa shaqyrdy. Kezdesýlerdiń nátijesinde quny 1 milliard dollar bolatyn 30 kommertsiialyq kelisimshartqa qol qoiyldy", – deidi Jeldibai.
Baspasóz hatshysynyń pikirinshe biznestiń damýy, investitsiialardyń kelýi saiasi júieniń ashyqtyǵy men turaqtylyǵyna bailanysty. Prezident Toqaev Túrkiiadaǵy basqosýda osy maqsattaǵy reformalarǵa arnaiy toqtalǵan.
«Besinshi maýsymda jalpyhalyqtyq referendým ótkiziletin boldy. Konstitýtsiiamyzdyń 33 babyna túzetýler engiziledi. Meniń maqsatym – halqyma meilinshe erkindik berý, demokratiia men zań ústemdigin kúsheitý. Prezident retinde eshqandai artyqshylyqtar men jeńildikterge qumar emespin. Mundaidy qalamaimyn», - dedi Memleket basshysy Túrkiia saparynda.
"Erdoǵan Memleket basshysyna arnalǵan ár sózin "baýyrym" dep bastap, sóz júzinde emes, is júzinde Qazaqstanǵa jan-jaqty qoldaý kórsetýin jalǵastyra beretinin aitty.
“Qazaq baýyrlarymyzdyń turaqtylyǵy, tynyshtyǵy men qaýipsizdigi úshin biz jaýapkershilik alýǵa daiyn ekenimizdi taǵy bir ret atap kórsetemin”- dedi.
Memleket basshynyń eki kúnge sozylǵan Túrkiiaǵa sapary osyndai baýyrlastyq, tilektestik, dostyq mazmunda ótti. Eń bastysy, jemisti ótti. Sebebi, mundai keńeitilgen strategiialyq áriptestikke buryn-sońdy qol jetkizilmegen edi. Iaǵni, tek sóz júzinde emes, naqty qujat arqyly strategiialyq áriptestik bekitildi.
Aitpaqshy, el prezidentteri ústel tennisiniń kezekti partiiasyn osy kúzde Qazaqstanda jalǵastyrýǵa kelisti", – dep túiindedi sózin Rýslan Jeldibai.
